Ang mga hinungdan sa paghikog

Dunay mga hinungdan kun nganong ang usa ka tawo buot mokutlo sa iyang kaugalingong kinabuhi. Ang nag-unang hinungdan mao ang dakong tinguha nga maka eskapo gikan sa naghatag og tumang stress nga kasagaran bunga sa internal conflict sa matag tawo o matag batan-on.

Tungod niini daghang mga hingtungdan ang buot molingkawas ning maong kahimtang ug gani buot silang matulog na lang kanunay aron sa ingon mamahimong makalimot sa gihambin ug gipas-ang mga problema sa kaugalingon ug sa palibot nga naghatag kanila og tumang kalisdanang emosyonal.

Lain nga tilimad-on kun ang tawo buot na lang nga magpunay og katulog kay ang pagpunay og katulog timailhan man sa tumang kaguol o kasubo. Sa laing bahin ang gihambing balatian mahimong makapatukmod sa tawo nga maghikog labina kun alang niya ang iyang gihambing sakit ang walay alibyo. Mahimong tungod pud sa pagkahanaw o pagkawala sa tawo nga giisip niyang importante sa iyang kinabuhi mao nga siya dili na lang buot pud nga mabuhi.

Ang tawo mahimong dili makaagwanta labina kun mawala ang iyang suod nga higala ginikanan, anak, hinigugma o dili ba kaha ang kasinatian sa pagkawala sa trabaho nga giisip niyang importante kaayo sa iyang kinabuhi. Ang tawo nga nagtuo nga siya nahimong problema sa uban o sa iyang pamilya ang mahimong buot maghikog labina kun alang kaniya nahimo naman hinuon siyang pabug-at sa iyang pamilya tungod ba kaha sa personal ug lawasnong problema nga iyang gidaladala nga tungod niini naapil ang iyang pamilya.

Ang tawong buot manimalos ang mahimong maghikog sa pagtuo nga siya makabawos sa mga tawong nakahatag kaniya og kasakitan pinaagi sa pagbilin og mga suicide notes agig pagtumbok sa maong mga tawo o tawo nga maoy nakaingon sa iyang paghikog.

Ang guilt feeling gumikan sa sala nga nahimo o ubos nga panlantaw sa kaugalingon ang makahimo sa tawo nga maghikog tungod kay malisud alang kaniya ang pag cope up sa maong kahimtang. Naka-focus siya sa sala nga iyang nahimo ug sa kahugaw sa iyang pagkatawo. Atensiyon kay wala siya matagad ang mahimong makaagni sa usa ka tawo nga mohimo og paghikog aron sa ingon siya matagad.

Ang paghimo sa ingon bisan pa man kun wala tuyoa ang mahimong madayonan na lang tungod sa maong tinguha nga tagdon.  Ang pagkontrol o manipulation sa usa ka tawo ngadto sa laing tawo pinaagi sa paggamit sa hikog nga isyu ingon nga paagi aron makabuot siya sa pagabuhaton sa maong tawo nga buot sa hingtungdan nga iyang kontrolahon. (Sumpayan)