Drama

Gipasakaan sa Ombudsman og kasong plunder si kanhi House Speaker Martin Romualdez. Tungod niini mipagawas dayon og warrant of arrest ang Sandiganbayan batok kang Romualdez.

Apan sa wala pa makapagawas og warrant of arrest ang Sandiganbayan batok kang Romualdez daan na kini nga nagpaadmit sa Cardinal Santos Medical Center sa San Juan City tungod sa cardiovascular event ug unstable blood pressure ingon man anxiety attacks.

Sa hospital na siya gipakita sa iyang warrant of arrest ug gikuhaan sa iyang fingerprint. Wala niya masulob ang uniporme sa piniriso kay matud pa adunay mga gipangbutang sa iyang lawas.

Ang kasong plunder nga gipasaka batok kang Romualdez drama lang ug pagpakita kunohay nga seryoso si PBBM sa paggukod sa mga korakot.

Gihimong sakripisyo ni PBBM si Martin Romualdez aron makalingkawas siya sa iyang kasalanan katumbas sa huyang nga kasong ipasaka batok kaniya sama sa kaso ni kanhi DPWH Secretary Manuel Bonoan nga nakalingkawas na sa iyang kaso human gihimong state witness.

Ang kasong plunder nga gipasaka batok ni Romualdez nakabasi sa 18 ka mga kanhi marines ug security escorts ni Zaldy Co diin ilang giingon nga naghatod sila og minalitang kuwarta kang Martin Romualdez ug President Bongbong Marcos Jr.

Busa kun ang testimonya sa mga kanhi Marines makabarug batok kang Romualdez nganong dili man kini makabarug batok kang PBBM? Gamiton kini nga argumento sa abogado ni Romualdez sa pagpaabsuwelto sa iyang kliyente.

Kun nakahinumdom pa mo, di ba mibahad man si Romualdez nga kun pasakaan siya og kaso mangamong siya kang PBBM? Karon nga gipasakaan na siya og kaso makapaabot ba ta sa iyang bahad kang PBBM? Ayaw na pagpaabot kay dili ni maoy moabot.