Bungkagon ang rice cartel

Limpyohan ang listahan sa mga importers ug negosyante og bugas ug ang kompleto ug dayag nga pagladlad niini mao ang yawe sa pagbungkag niadtong mga nalambigit sa rice cartel. Mao kini ang nakitang sulbad sa gobernador sa Ilocos Norte nga si Imee R. Marcos sa suliran sa pagsulbong sa presyo sa bugas sa nasud.

Ang gobernador nga magpapili sa pagka-senador karon umaabot nga piniliay niingon nga ang pag-ilis sa import quotas og taripa dili makabungkag sa mga magpapatigayon nga nagpahimulos sa presyo sa bugas.

Para kaniya, ang paglimpyo sa listahan sa gobiyerno niadtong mga nalambigit sa pagpalusot, pagsabotahi sa ekonomiya, mga nagtago og bugas ug dili mamayad og buhis mao ang sulbad sa pagsulbong sa presyo sa bugas.

Matud pa ni Imee Marcos, mao lang gihapon og walay mausab sa rice cartel ubos sa tariffication tungod kay ang mga smugglers, economic saboteours, hoarders ug mga tax evaders ra gihapon ang magkontrolar sa sistema sa pagpalit og bugas sa gawas sa nasud ug sa pagbaligya niini dinhi sa nasud.

Ang ilang pagkontrolar sa sistema dili masulbad sa rice tariffication nga balaudnon nga nakaung-ong karon sa Kongreso hinuon ang pagbawi sa ilang lisensiya ug permit sa pag-angkat og bugas sa gawas sa nasud usa ka seryuso nga suntok batok sa mga mapahimuslanon maong mahadlok sila niini. 

Si Gobernador Marcos nagkanayon nga ang mga sakop sa rice cartel nagpatuyang sa pagpahimulos sa presyo sa bugas tungod kay wa sila mailhi kay nagtago sila sa mga nakakandado nga drawer, file cabinets, computers ug sa utok sa pipila ka mga opisyal ug kawani sa gobiyerno.

May punto ang gobernador sa iyang sugyot tungod kay dili ikalimod nga daghang mga negosyante ug importer og bugas nga mga impostor sama sa mga kooperatiba nga ang mga sakop mga mag-uuma diin tungod kay wala silay kapasidad sa pag-angkat og bugas sa gawas sa nasud ilang gipagamit ang ilang lisensiya sa mga smuggler og bugas.