Ang ‘Gout’ aron dili mosamot (1)

Unsa ba kining “gout”? Usa kini ka matang sa implamasyon sa mga sama sa gagmay nga kabukogan o mga lutahan, nga sagad magsugod ang panakit sa tiil, sa kumagko nga manghubag o mamula.

Kalagmitan, mao kini ang unang senyales nga kun mograbe na nga dili matagad, saw-on kini sa sakit nga “gouty arthritis”.

Makahasol kini, puypoyon nga baldahon kita sa dili lalim nga magbalik-balik ang grabe nga kasakit niini. Murag makaungol kita sa inagulo sa di masabot nga gibati.  Nga ingon sa mawala ang kaugalingon sa maayong kabuot (good mood). Epekto kini sa natigum nga “purines” sa lawas gikan sa atong gipangaon ug gipang-inom. Ang “uric acid” produkto kini sa “purines”, nga mosagol sa sirkulasyon sa dugo.

Manugsok kini sa hingtungdang mga parte sa lawas, nga ang porma niini mga asin nga talignison nga murag dagom (needle-like form), nga maoy hinungdan sa bation nga panakit.

Natural nga “compound” ang “purines” nga sagad makuha kini gikan sa pagkaon og karne ug sa sud sa ginhawaan (internal organs) sa mananap.

Naa sab kini sa mga tanum apan dili kaayo kini daghan nga makatandok sa lawas.

Kun ugaling medyo imo na kini nga nasinati ang panakit nga “gout”, kinahanglang maghinay o likayan na ang mga pagkaon nga makapasamot niini.

Sama pananglitan sa mga mosunod nga pagkaon o ilimnong nagbaton og taas nga epekto sa purines:

* Tanang klase sa ilimnon nga alkoholik apil na niini ang mga beer.

* Mga pagkaon gikan sa dagat, labi na sa lagumon og unod nga isda o gikan sa kalapukan, mga kinhason, kasag, sugpo, lambay ug uban pa nga apil sab ang sardinas

* Ubang karne nga giproseso sama sa bacon, soreso, hotdog, pabo, organ meats o sa sud ginhawaan ini sama sa atay.