Lana nga pawagtang sa uric acid (2)

Ang pag-inom sa ‘black pepper essensyal oil’, magsuplay kini sa lawas og isog nga antioxidants (sesquiterpenes), aron paganahon ang singot ug ihi, aron malimpyohan ang dugo sa mga toksins nga uric acid nga igawas gikan sa lawas.

Makatabang sab ni sa pagpahilis, pagana nga padaghanon ang prodaksyon sa apdo ug sa mga asidic juice aron makatabang sa mga kinaon nga dali ka nga kahilisan.

Makapaalibyo sab kini nga pampurga (anthelmintic), pagkontrol sa labihan nga kasingtanon, palimpyo o pahilis sa plema sa baga, ug palayaw sa dugo ug paalibyo sa butod sa tinai ug sa tiyan nga wagtangon ang toksik gas nga maoy nakapaalburoto niini. Makapakalma sab kini sa kabalaka ug sa nerbiyos.

Laing kagamitan sa black pepper essential oil, mahimo ni nga ‘natural preservative’, aron dili dali mapan-os ang pagkaon, labi na sa sinabaw nga potahe, sama sa tinolang isda ug manok, gumikan sa antimicrobial, antifungal ug antibacterial niini.

Mga pahimangno – walay angay nga kahadlokan kon kini gamiton, gawas lang kon palabian, kay makalipong, o dili mahimutang ang kaugalingon nga ingon sa kasukaon, dili katulog nga mag-alindasay, iritasyon ug implamasyon sa tinai, init ang lawas nga labihang nakasimhot sa ‘blackpepper’. Hinuon, dili kaayo ni seryuso, apan ilayo lang sa mata ug ilong, kay makairitar kini nga mamula ang mata ug makapaatse nga ang ilong nagtulo ang tubig.