Kabataan sa kagabhion

Niabot og 55 ka menor de edad ang nahipos dihang ang kapolisan nipatuman sa curfew ordinance sa dakbayan sa Mandaue kaniadtong nakalabay nga semana.

Kadaghanan sa mga bata naglaruy-laroy sa kadalanan ug ang uban nagyampungad sa mga internetan bisan sa lawom na nga kagabhion.

Giklaro ni Senior Superintendent  Jonathan Cabal, director sa Mandaue City Police Office (MCPO), nga dili dakop, kun dili, pagluwas sa mga menor de edad ang ilang gihimo gikan sa mga peligro nga panghitabo nga ilang masugatan panahon sa kagabhion.

Gidala sa police station ang mga bata ug gihatagan sila’g pagkaon sa wala pa gitugyan ngadto sa Mandaue City Social Welfare Service Office aron mahatagan og mga tambag, apil na ang ilang mga ginikanan.

Dihang miadto ko sa social welfare service office aron ma-follow up ang isyu sa mga bata, pagsulod pa lang nako, gibalibaran ko sa babaye nga misugat nako kay wala kuno diha ang ilang labaw.

Nangutana ko kun wala bay lain nga makagahin og pila lang ka minuto paghatag og update sa pag-rescue sa mga bata, apan giingnan na man hinuon ko nga "sudla lang diha sa door 1."

Tuod man dihang akong gisulod, ni pulong balibad o mosugot wala gyud. Tuyo unta nako nga makapangayo’g mensahe gikan sa social welfare service office aron mapaabot ngadto sa publiko ang mga angayan ug dili angayan nga buhaton nunot sa gipatuman nga curfew ordinance. Tingali busy lang gyud sila kay matud pa sa ubang mga bata nga akong naestorya may mga nakasibat man bisan sa mga na-rescue bisan nga wala pa adtoa sa ilang mga ginikanan.

Mao sab unta kini ang akong pangayoan og katin-awan kun tinuod ba o dili apan busy lagi sila. Sa pag-implementar sa curfew, gikinahanglan unta kaayo ang pagpasabot sa publiko diin usa sa makatabang niini ang media nga magsilbe nga tulay sa kasayuran ngadto sa kinabag-an.

Apan wala usab kini mahimo kun busy o dili gyud andam moatubang sa media ang tinubdan.