Mga dumadapig nasagmuyo

Dako’ng kasagmuyo ang gibati sa mga dumadapig ni Davao City Mayor Rodrigo Duterte diha nga iyang gipahibalo nga dili siya modagan pagka presidente sa Pilipinas sa eleksyon karong Mayo 2016.

Ang iyang pamahayag mura’g liti sa udtong tutok nga maoy nakapabungog sa iyang mga dumadapig nga nangandoy ug naglaom nga siya maoy makahatag og kasulbaran sa suliran nga giatubang sa nasud.

Sama sa grabe nga corruption sa gobiyerno, ang makapakitbi sa atay nga kriminalidad nga naghatag og dako’ng hulga sa adlaw-adlaw’ng kalihokan sa katawhan ug ang wa’y puas nga pagpayuhot sa gidili nga drugas.

Kinsa ang magtuo nga dili modagan si Duterte pagka-presidente nga nagsuroy-suroy na man siya sa ubang lalawigan sa atong kapupud-an?

Gani sa Manila, sa akong pag-estar og pipila ka bulan adunay mga pribado nga sakyanan nga nagbutang og propaganda ni Duterte nga nagkanayon: “Duterte ato ni Pre.”

Nakaingon ko, maayo sab aron aduna na say Bisaya nga presidente. Kahinumdoman nga si Carlos Polistico Garcia, usa ka bisaya nga gikan sa Bohol, napili nga presidente kaniadto pa nga 1957-61, ug hangtud karon pulos mga tagalog.

Apan kay nipadayag na man si Duterte nga dili siya modagan pagka-presidente, mapugos gyud ta pagpili niining tulo ka dagkong ngalan nga magpapili nga sila si VP Jejomar Binay, kanhi DILG Secretary Mar Roxas ug Sen. Grace Poe.

Kinsa kaha niining tulo ang hatagan nimo sa imong boto de kompiyansa? Si Binay nga adunay lama sa corruption? Si Roxas nga ang issue niya mao ra ang pagkalangay paghatod sa hinabang sa mga biktima sa bagyo nga Yolanda? O, si Grace Poe nga adunay dual citizenship?

Kini maoy atong timbangtimbangon pag-ayo kay anugon ang atong pagpili kun mosipyat ta sa paghukom. Hinumdomi kining panultihon: “Ang gahum makapahubog bisan pa sa labing malumo nga mga kasingkasing, ingon nga ang alak makahubog usab sa labing malig-ong mga ulo o mga hunahuna.

Busa, dili maalamon o makatarunganon nga saligan ang tawo sa usa ka gahum nga walay kinutoban.”