Warning sa mga kriminal

Gideklara sa kapolisan sa dakbayan sa Lapu-Lapu nga sulbad na ang kaso sa pagpatay sa estudyante nga si Karen Kaye Montebon. Kini sa dihang napatay usab ang suspetsado didto sa Bohol pipila ka adlaw human sa maong krimen.

Pagpanulis ang nakita sa kapolisan nga hinungdan sa kamatayon sa 17-anyos nga si Montebon, kinsa nakit-an na lamang nga nagbuy-od sa iyang amahan sulod sa ilang panimalay sa usa ka subdivision didto sa maong dakbayan.  

Angay lamang usab nga atong pasidunggan ang kapolisan sa dakbayan sa Lapu-Lapu sa dali nga pagsulbad sa maong kaso. Tungod usab sa subsob nga imbestigasyon, dali ra nga napunting ang suspek ug ang iyang lokasyon.

Apan bisan pa man niini, angay lamang usab nga mohimo og pakisusi ang otoridad kun kinsa ang nagpatay kang Ruben Fernandez, ang suspek pagpatay kang Montebon, atol sa iyang pagtago didto sa lungsod sa Getafe sa Bohol. Matud pa sa taho, inpormante kuno sa kapolisan ang nagtiklo ni Fernandez. Tungod kuno kay padulong na kini moikyas gikan sa nagpadulong nga mga pulis sa isla nga iyang gidangpan mao nang gibirahan dayon sa inpormante si Fernandez.

Dako usab ang pangutana karon kun unsa ang tulobagon sa nagpatay kang Fernandez.

Gukdon ba kaha usab kini sa otoridad? O pasagdan lamang ba kini tungod kay kun wala pa kini miaksiyon dayon, hayan nga nakasibat na usab si Fernandez.

Mikatay na ngadto sa laing pahina ang kaso pagpatay kang Montebon. Sulbad na tuod kini kun ang kapolisan maoy atong pangutan-on.

Apan adunay tanghaga usab nga naglikos kabahin sa kamatayon sa suspek. Ato lamang atangan unsay lakang sa otoridad.

Hinuon, sa laing bahin, ang daling kasulbaran sa kaso sa pagpatay kang Montebon magsilbi usab nga warning ngadto sa mga bugok sa katilingban nga dili gayud sila makalingkawas sa ilang kriminal nga binuhatan.

 Dako kini nga puntos alang sa kapolisan sa ilang kampanya pag-isa sa ilang imahe batok sa kriminalidad. Ang ilang kalampusan naghatud usab og mensahe ngadto sa publiko nga alisto sila pagsulbad sa mga krimen aron mapatunhay ang kahusay ug kalinaw sa komunidad.