Gibaligya og apil sa kasikbit ang yuta

Dear Atty. Divine,

Duna ko’y pangutana may labot sa yuta nga kabilin sa among apohan. Kini’ng maong yuta gibahin-bahin na kini sa upat ka mga igsuon apil ang akong mama samtang ang share sa iyang igsuon nga dalaga gipalit na sa akong mama. Apan karon naproblema kami kay ang kasikbit sa among yuta gibaligya ug giapil man ang among yuta ug napatitulohan na gani kini karon. Ang akong pangutana kun mabawi pa ba namo ang maong yuta? Nagsige pa kami og buhis sa yuta hangtud karon sa Assessor’s Office ug ila pa man nga gidawat ang among buhis. Unsa may angayan namo nga buhaton? - Junior

Dear Junior:

Kun tinuod g’yud nga gibaligya og apil ang inyong yuta sa kasikbit nga tag-iya then mahimo kini ninyo nga ireklamo sa barangay diin mahimutang ang inyo’ng yuta. Ireklamo ninyo ang nagbaligya ug ang gibaligyaan niini. Imong ipakita kanila ang mga dokumento nga magpamatuod nga ang imong inahan ang tag-iya sa maong yuta pinaagi sa pagpresentar sa Tax Declaration , titulo kun duna or Deed of Absolute Sale. Inyo ‘sab sila’ng pangayoan og dokumento pagmatuod nga sila dunay katungod sa pagbaligya sa maong property aron mahibaw-an ang kamatuoran. Inyo’ng i-insister sa barangay nga inyo’ng kuhaon ang maong property nga gipanag-iya sa imong inahan. Mahimo ‘sab nga inyo’ng kuralon ang maong yuta ilabi na kun dugay na kamo nga nag-ukopar niini. Apan kun di g’yud kamo maareglo sa barangay then mahimo ka nga modangop sa Korte pinaagi sa pagpasaka og kaso ug imong ipakanselar ang titulo sa yuta nga naglakip sa property sa imong inahan. Thanks and God Bless. - Atty. Divine