Ang propaganda ni Binay

Nangapud-apod si Bise Presidente Jejomar Binay og tabang sa mga naigo sa bagyo sa lalawigan sa Sugbo sama sa mga pagkaon ug salapi, ilabi na sa mga namatyan.

Ang ako lang nabantayan mao nga ang gipanghatag ni Binay adunay marka sa iyang pangalan ug opisina busa sa kaugalingon ako nangutana kun kaugalingon ba sa bise presidente ang salapi ang gigasto pagpamalit sa mga gipanghatag ngadto sa mga biktima sa bagyo?

Iya ba nga personal nga salapi ang iyang gipanghatag ngadto sa pamilya nga namatyan tungod sa bagyong Seniang? Kun iyaha man ugaling kini, dalaygon ang gihimo ni Binay ug nakalabaw siya niini sa iyang mga posible’ng makaatbang sa umaabot nga presidential elections.

Pero kun dili iya nga salapi ang gigamit ug gigasto, nanglamang siya sa iyang mga kaatbang ug sa katawhan.

Kun ang salapi nga gihatag ug gigasto gikan sa iyang opisina dapat ang ibutang nga marka sa mga pagkaon ug salapi gikan sa katawhan sa Pilipinas (From the People of the Philippines) ug dili kay gikan sa bise presidente kay dili man kini iya, iya man kini sa katawhan.

Sigun sa akong nakita, kanunay na kini’ng gihimo ni Binay busa awhag nako niya ug sa iyang mga “alipores ug turotot” nga kinahanglan nga mosulti sila sa tinuod nga tinubdan sa salapi ug mao kini ang ilang ipahibawo pinaagi sa pagmarka niini sa ilang mga ipanghatag di kay sila mangilad ug manglipat.