Mga baboy gi-aircon?

Kun maminaw ka sa mga balita sa TV ug radio, labaw na og mobasa ka sa mga balita sa mantalaan, dili ka g’yud makapugong sa pagpanglingo-lingo sa nagkaanam na kadaghan nga giingong dili maayo’ng binuhatan ni Vice President Jejomar Binay.

Kay kanunay man nako nga madungog kada adlaw g’yud ang mga report kabahin ni Binay, dili na ako makapaneguro nga mobotar pa kaniya kun iyang idayon ang plano nga pagpapili pagka presidente sa 2016 elections.

Hinuon, gisusi pa karon ang katinuoran sa pasangil nga si Binay adunay labing menus upat ka mansyon ug kapin sa 300 ka hektareya nga hacienda apan matud sa report gipadumala lang niini sa iyang mga “dummy.”

Kun dili man kini tinuod, angay’ng pamatud-an ni Vice President Binay nga namakak ang mipasangil kaniya nga si kanhi Makati Vice Mayor Ernesto Mercado.

Si Mercado apil sa mibutyag nga si Binay nakadawat og minilyon ka pesos nga kuwarta isip komisyon sa gi-overprice nga P2.7 bilyones nga Makati Parking Building ug uban pa nga proyekto sa Makati.

Ang kanhi bise mayor sa Makati misaysay gayud atubangan sa Senate Blue Ribbon Sub-Committee nga si Binay mao ang tinuod nga tag-iya sa Agrifina Corp., ang kompaniya nga giingong maoy tag-iya sa lapad kaayo nga hacienda sa Barangay Maligaya, Rosario, Batangas.

Ang akong kauban sa opisina mitan-aw sa iyang Facebook ug nakita ang mga piggery sulod sa hacienda nga matud pa “air-con” ang mga baboy. Bi, kinsa may dili makapanglingo-lingo ana.

Nangomedya ang akong amigo nga maayo pa kuno’g magpababoy-baboy siya aron kanunay siya nga bugnaw ang kahimtang. Ang lapad kaayo nga Rizal Park sa Manila kaunomon ang gidak-on usa makatumbas sa kalapad sa hacienda nga giingong iya ni Binay.

Angay gayud nga pamatud-an ni Mercado ang iyang pamasangil. Daghan ang miingon nga ang gihimo ni Mercado pangdaot lang kuno ni Binay. Aw, kun dili man gani tinuod, ikiha niya ang kanhi bise mayor.

Apan kun si Binay dili gani makahatag og tukma nga rason ug igo lang moingon nga gusto lang siya nga dauton ni Mercado, mosamot nga ang katawhan mabugnaw pagsuporta kaniya.

Angayan gayud nato nga himbisan pag-ayo si Binay kay nagtinguha man gud siya nga mahimo’ng presidente sa atong nasud. Sayonan ka nga kun masayop kita pagpili, unom ka tuig kita nga magmahay.

Bilib man unta ko ani’ng Binay kay kalma ra kaayo, apan tungod sa mga report nga dili maayo, anam-anam ko nga wala na ganahi niya.