Ang sayop nga husto

Adunay leksyon nga kinutlo nato gikan sa igsuon nga mantala ang nasyonal, nga kakuhaan og pagtulon-an sa kinabuhi.

Sagad gud, may mga tawo nga dali ra kaayo makahusga nga sayop ang usa ka situwasyon o opinyon. Kay lagi nagtuo nga permi siya husto, bisan pa man sa dili pagpaminaw sa katarungan, nga misumbalik hinuon kaniya nga maoy nasayop.

Sa mga bata nga nagtuon pa, may posibilidad nga sila masayop gyud.

Apan usahay adunay mga punto nga ang gituohan natong sayop nila, usa diay ka dakong husto. Tungod kay managlahi ang atong pagsabot o lohika sa usa ka butang nga gihulagway o nakita nato.                              Sama sa maestro ngadto sa iyang tinun-an nga nagtuki sa matematika o pag-ihap, nga maoy itudlo sa mga bata.

“Jimboy, hatagan tika’g usa ka mansanas, unya pun-an nako’g lain nga usa gihapon ka mansanas…. pila ka mansanas na tanan ang anaa nimo?” Dugay nakatubag ang bata….“ Kuan mam tulo”.  Mipahiyom ang maestro nga nakasabot sa sayop ini nga pagtubag, tingali wa kaayo makaila sa mansanas.

Busa nangutana’g lain, kadtong mga dulaan nay gihimong ehemplo sa pag-ihap.

Nakadayeg ang maestro kang Jimboy kay nahusto na ang pag-ihap. Busa gibalik niya pagpangutana kadtong sa mansanas,  kun pila gyud ang hustong tubag. Miinsister gyud ang bata nga tulo tanan ang mansanas nga naa niya.

Nakalitan ang maestra, ang ikatulo diay’ng mansanas iyang bawon naa sa bag.

Busa, angay gyud paminawon pag-ayo, unsa may mga opinion sa uban, dili sabton nga sayop kini hangtud di nato matugkad kun ngano naingon niana.