Leksyon sa sunog

Ang dakung sunog nga miugdaw og daghang kabalayan sa Barangay Lorega-San Miguel magsilbi unta nga leksyon sa katawhan nga dili gayud maayo nga pasagdan ang mga hinakog nga buhat sa pipila nato ka silingan.

Kun ang mga opisyal sa Barangay Lorega-San Miguel nagtagad pa aron hawanan ang karsada nga nahimutang luyo sa karaang ihawan nga karon gihimo na nga sports complex, tingali makaagi gayud unta ang fire trucks aron pagpawong sa sunog.

Kamo nga mga pamilya’ng nasunogan nganong nagpakabuta-bungol ra man mo sa abuso sa inyong mga silingan. Dugay ra ko nga nakapanglantaw nga muabot ang higayon nga masunog ang mao nga dapit kay dili man makasulod ang mga bombero kun adunay sunog.

Nakasabot usab ko nga ang mga opisyal sa barangay wala gayud mohimo’g lakang aron papahawaon gikan sa mao nga karsada ang mga tawo nga nagtukod og tindahan nga nakapagamay sa agianan, wala na’y sakyanan nga makaagi.

Klaro kaayo nga nahadlok ang mga opisyal kay kun pugson nila pagpapahawa ang mao nga mga tawo nga naninda maibanan ang ilang botos sa eleksyon. Sagdi na lang, kun maglantugi pa kita karon, wala nay mahimo kay napulbos na ang kabalayan.

Sa giingon nako, leksyon kini sa umaabot ug kadtong anaa sa mga dapit nga wala pa makasinati og sunog. Nahinumdom mo sa Sitio Bati, Ermita? Wala ‘sab makasulod ang trak sa bombero kay sa dapit sa entrada, adunay atop nga nagbabag na sa agianan.

Didto sa Barangay Luz atol sa sunog kaniadtong miaging tuig ba kadto, mireklamo usab ang mga bombero kay dili man dayon sila makasulod. Daghan lagi kaayo nga mga mapahimuslanon sa higayon.

* * *

Ang akong pangutana nga wala pa gayud kahatagi og tubag mao kini. Giunsa sa NBI ug sa mga imbestigador sa kapolisan pagkasayod sa plate number sa mga sakyanan nga gisakyan sa mga mibanhig ni Atty. Noel Archival?

Nakuha ba sa Closed Circuit Television Camera ang mga plate numbers sa sakyanan? Diin ug kang kinsa nga CCTV ang nakakuha sa footage? Kun reporter pa ako sa polis kini nga pangutana maoy ako nga ipursigir.

Mao kini ang nagsilbi nga “link” kun ngano nga ang kapolisan mi-apply og search warrant didto sa hukmanan aron tugutan sila nga masiksik ang dapit nga giingong gibutangan sa upat ka sakyanan. Ang dapit nga gi-search mao ang butanganan sa mga inimbargo nga sakyanan sa PNP Highway Patrol Group.

Pastilan, kun tinuod man nga ang mibanhig ni Atty. Noel Archival mga taga HPG, makapanlimbawot sa balhibo.