Lay ministers wala mangluhod

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Giawhag sa kura paroko sa Alliance of Two Hearts church nga sa akto sa dili pa ang pagpangalawat, diin iisa sa pari ang ostiya dungan ang pag-ingon: ‘Kini mao ang lawas ni Kristo...,” kinahanglang mangluhod ang tanan. Ang maong pahibalo gipaskin pa diha sa bungbong duol sa hagdanan paingon sulod sa simbahan.

Nalipay kining tagsulat nga alas 4:00 sa hapon nga misa niadtong Domingo, Pebrero 2, nangluhod ang tanang nanimba. Apan sa samang higayon naguol usab tungod kay didto sa atubangang bahin sa lingkoranan, wala man gyud mangluhod ang tulo ka lay ministers samtang gibayaw na sa itaas sa pari ang pormas.

Sakit kaayo sa dughan ang maong talan-awon. Kay isip lay ministers, sila mao ang sumbanan sa mga maayong buhat ug sulondong tulomanon. Sila ang tigpakalawat sa katawhan. Ang kaputi sa sinina nilang gisul-ob naglarawan kini sa ilang kaputli, kaligdong ug kabuotan sa pagsunod sa mga sugo sa Ginoo. Pero dihang miabot sila sa akto sa pagpangluhod (nga maoy gustong ipasunod sa simbahan), ang maong tulo ka lay minister nagpabilin lang gihapong nagbarog. Ngano man? Lisod ba diay kini buhaton, mga piniling lay minister? Lisod ba diay tumanon ang sagradong awhag sa pari?

Abi namo’g ang dautang elemento ra, kinsa wala’y simbasimba ang gahi’g ulo. Hasta sab diay ang sige’g alagad sa simbahan? Mga brod, tanang mata sa nanimba nakatutok sa altar, straight forward to the Lord. Maot kaayo kun kini masalipdan sa gamay’ng buling nga inyong nahimo.

Mapuling sila ug maputol ang kasolemne sa ilang pag-ampo. Busa, intawon, pagbag-o na. Please always set a good example.