Panglingla

Daghan sa mga senior citizens ang nangreklamo sa gihimong pagpahimulos kanila sa Team Rama atol sa pagduso sa mga kandidato niini sa ilang certificate of candidacy didto sa buhatan sa Commission on Elections usa ka semana na ang milabay.

Reklamo sa mga senior citizens una mao ang pagsakay sa grupo ni Mayor Michael Rama sa ilang kalihukan.

Nagbagulbol ang mga senior citizens tungod kay klarong gituyo sa dakbayan paglangan ang opening sa Senior Citizens Month aron iatol sa filing sa COC sa Team Rama.

Sukwahi sa naandang pagbukas sa kalihukan sa nangaging katuigan nga gihimo sa unang adlaw sa buwan sa Oktubre karon gihimo ang pagbukas sa petsa 5 na atol sa pagduso nila ni Rama sa COC.

Tataw nga ilang gikabay-an ang kalihukan sa mga senior citizens aron ipakita nga kunohay suportado siya sa maong hut-ong.

Laing posibling rason mao nga aron ang posibling ang gasto sa ilang gimik ihapak sa dakbayan tungod kay mogawas man nga opisyal nga kalihukan pagbukas sa Senior Citizens Month.

Ikaduhang gireklamohan sa mga tiguwang mao ang giingon nga pagpangilad kanila.

Wala sila sultii nga ang misa nga ilang gitambongan iya diay sa Team Rama ug dili alang sa pagbukas sa ilang kalihukan.

Nabisto ang maong tinunto tungod kay dili tanang senior citizens supporter sa mayor.

Ang mga supporter sa Bando Osmeña Pundok Kauswagan maoy nakabunggo niini tungod kay nasuko sila nga gawas nga sila giilad gipahubo pa sa chaliko nga ilang gisul-ob ug gipailis og t-shirt sa Team Rama.

Unang nangreklamo ang mga tiguwang gikan sa Sawang Calero.

Si Rama nga gikuhaan og reksiyon sa media dili kahatag og tataw nga pagpasabot.

Gani giingong nagdumili ni pagtubag sa isyu.

Pastilan pagkalampingasan sa mga tawo nga mipahimulos sa mga tiguwang. Wala gyud mahadlok nga gabaan.

Wala mo maluoy nga ang ubang senior citizens naglisod na gani og lakaw aron lang pagtambong sa ilang kalihukan unya inyo lang giilad.  

Dili mauwaw nga mokampanya alang sa tul-id nga pangagamhanan ug kunohay kausaban nga sa sinugdanan pa lang sa inyong tinguha puno na sa pagpakaaron-ingnon ug pagpanglingla?

Kun tinuod nga kausaban ilang gusto angayang ilang gisugdan ang ilang kampanya sa tim-os ug lunsay nga binuhatan.

Ang pagpanglingla kun alang nila normal, ambot unsay klase sa panggobyerno ang nagpaabot sa mga molupyo sa dakbayan ubos sa ilang pamunoan.

* * *

[email protected]