EDITORYAL - Ang lamppost sa sidewalk karon tag P10 mil ra

Sa nakakita sa front page sa The Freeman ug Banat News niadtong Hunyo 4, nagbuntaog didto ang hitsura sa mga lamppost nga gipanarok karon sa sidewalk sa Osmeña Boulevard ning dakbayan nga tag P10 mil ra.

Nindot og dagway, may postura gyud kay may dekorasyon man ang maong lamppost itandi sa lamppost niadtong ASEAN summit nga anaa nagbarog pa man karon sa kadaplinan sa karsada ang uban niini, nagtuhoy lang murag sag-ob nga kawayan, unya tag P250 mil ang matag usa.

Maoy hinungdan nga ang mga kawatan magpunay og sil-ing sa lawas ug ilawom sa maong mga lamppost pamasin nga may gold bar ang sulod niini.

Ang uban gipanggabas ug dihang nasuta nga way nahut ang maong mga lamppost nga di gani mahalin og P1,000 sa mga junk shop, aw gipasagdan nalang kini ug gibiyaan nga wa   panghilabti.

Hangtud nga nakahukom si Mayor Rama nga ipalarot nalang ang maong mga lamppost kay samtang makita pa kini nga magbarug sa mga sidewalk, mosurok ang dugo sa mga tawo nga nasayud sa binilyako sa ubang mga opisyal sa goberno nga mipresyo sa maong mga poste og tag P250 mil matag usa.

Pastilan baya , kadaghang maldito ning kalibotana nga kun di mapakgang, Hesus magkamuritsing ang panudlanan sa goberno ug moburot ang bulsa sa mga bilyako.

Ambot kumosta na kaha tong mga opisyal nga maoy namirma sa mga kontrato pagpatarok sa maong matang sa lamppost nga tag P250 mil matag usa.

Asa na kaha sila karon, maayo unta kun nakakita sila sa lamppost nga anaa sa sidewalk sa Osmeña Blvd. karon unya mokatawa og dako ug moingon nga "kadako baya unta sa among ginansya.”

Makalagot man apan ang tinuod ang uban mosentro lang pagsaway sa mga opisyal sa goberno nga mao ray korapso, wa nila hunahunaa nga ang mogiya sa mga taga goberno aron makakawat og dagkong kuwarta gikan sa panudlanan sa kagamhanan mga pribadong tawo ra usab. Di ba?