Ang pangilin ni Senyor San Jose sa Mandaue

Gihugopan sa daghang mga tawo ang tinuig nga pangilin ni Senyor San Jose nga maoy patron sa dakbayan sa Mandaue sukad pa sa pagsugod sa unang gabii sa gipasiugdahang kalihokan ug mga kalingawan hangtod na sa iyang adlaw sa kapistahan niadtong Mayo 8 niining tuiga.

Sa gipahigayon nga misa atol sa kapistahan niadtong Mayo 8 sa sulod sa National Shrine ni Saint Joseph nga gidumala ni Archbishop Jose Palma maoy nag-una sa pagtambong si Gobernador Gwendolyn Garcia ug gikuyogan usab kini ni Mayor Jonas Cortes ug mga sakop sa konseho nga gipangulohan ni Bise Mayor Glenn Bercede.

Daghan ang nag-ingon nga ang misaksi sa mga kalingawan sa matag gabii nga kalingawan nga ang kasagaran niini gihimo sa atubangan sa city hall.

Ang nag-una sa mga kalihokan nga gipasiugdahan sa kagamhanan sa matag tuig nga pagpili mao ang pagkorona sa hara sa dakbayan kun Miss Mandaue nga gipahigayon sa Convention Hall sa J. Mall Center sa dalan A.S. Fortuna sa barangay Bakilid.

Ang gikoronahan nga hara sa maong dakbayan karong tuiga mao si Nicole Tuazon nga maoy napili sa mga hurado karong tuiga gikan sa 12 ka mga opisyal nga kandidata sa Miss Mandaue 2012.

Bisan kun tuyoon ug dili bukas sa publiko ang gipahigayonan sa koronasyon sa Miss Mandaue karong tuiga apan namatikdan nga nagdasok lang gihapon ang mga tawo nga mainiton nga misaksi sa pagpili og Miss Mandaue ug hangtod sa koronasyon nga gihimo niini.

Ang unang ginang sa dakbayan nga si Mrs. Sarah W. Cortes maoy nangulo sa gipahigayon nga Miss Mandaue 2013 sa miaging gabii ug si Mayor Jonas Cortes ug Bise Mayor Glenn Bercede maoy nangulo sa mga opisyal sa kagamhanan uban sa ilang mga sakop sa konseho nga sila si Konsehal Lollipop Ouano Dizon, Konsehal Jimmy Lumapas, Konsehal Elstone Dabon, Konsehal Diosdado Suico, Konsehal Demetrio Cortes Jr. Jeffy Ceniza ug uban pa.

Gisaksihan usab kini nila ni 6th District Board Member Thadeo Ouano uban sa iyang amahan nga si kanhi mayor Alfredo Ouano, Board Member Arliegh Sitoy ug Bise Gobernador Agnes Magpale.(Romeo T. Limpangog)