Ang summer job sa mga tinun-an

Nahimo na nga tinuig nga programa sa kagamhanan ang pagpasiugda og summer job sa panahon sa bakasyon sa mga tinun-an isip paagi nga pagtabang sa kabus nga mga ginikanan sanglit ang suweldo nga madawat maoy magamit sa mga galastohan sa panahon sa pagbukas usab og balik sa klase sa mga tulunghaan.

Gipatuman ang maong programa pinaagi sa pagtinabangay sa Department of Labor and Employment (DOLE) sa matag rehiyonal niining buhatan ug ingon man sa matag lokal nga kagamhanan o mga pribadong buhatan nga nagtanyag usab og summer job.

Nagtampohay og gahin nga salapi ang maong duha ka buhatan sa kagamhanan o mga pribadong buhatan nga maoy gihatag nga suweldo sa matag tinun-an nga mosalmot sa summer job nga ilang gipasiugdahan.

Gihangop kaayo sa mga ginikanan ang maong programa sa kagamhanan sanglit makatabang man kini sa kalisod   alang sa pagtubag sa mga panginahanglan sa mga anak nilang nagtungha sa high school o kolehiyo nga mga tinun-an.

Ang uban nga mga ginikanan nakadayeg kaayo sa maong programa sa kagamhanan tungod kay nagsilbi usab kining gikalingwan sa mga kabataan sa panahon sa bakasyon nga imbes adto mopaingon sa mga barkada sa pag-apil sa mga kalingawan nga walay kapuslanan adto na man malingaw sa pagtrabaho sa summer job. Hinuon adunay mga higayon nga makasinati usab og mga pagsaway ang maong tinuig nga programa sa kagahamhan kun gamiton sa pamolitika sa mga opisyal sa mga lokal nga kagamhanan ang summer job nga ilang gipasiugdahan.

Kini mahitabo kun ang mga opisyal sa mga lokal nga kagamhanan maoy ilang paapilon sa summer job nga mga tinun-an kadtong mga anak sa suod nilang ginikanan sama sa ilang lider sa politika o mga lumalaban.

Laing higayon nga makasinati og pagsaway ang maong programa kun madugay sa pagpagawas ang suweldo sa maong mga tinun-an nga miapil sa summer job ug dili na hinuon nila magamit ang suweldo nga gidawat sa ilang galastohan sa pagbukas sa klase sa anak nilang nagtungha.