Ang impeachment trial ni Corona

Dili ikalimod nga gikalingawan karon sa katawhan ang impeachment trial ni Chief Justice Renato Corona nga gipangulohan ni Senate President Juan Ponce Enrile nga gipakita live sa telebisyon.

Si Senador Bong Revilla sa gipadayag nga komentaryo sa miangkon nga ang nagpadayon nga trial kang CJ Corona dako kaayo og epekto sa mga gimbuhaton dili lang nila nga mga senador kun dili apil na sa mga tawo nga nagsunod sa pagsaksi niini.

Ang maong pamahayag ni Senador Revilla daw mitukma usab sa tinuod nga nahitabo sa katawhan nga naepekto sa ilang mga matag adlaw nga gimbuhaton kay adto na man lang magyampungad sa pagsaksi sa impeachment trial sa telebisyon.

Dugang kalangan nga masinati kay kun mahunong na ang impeachment trial sa maong adlaw ang pipila nga nakasaksi niini dili pa gayod molakaw kay makighinabi pa man sa mga higala nga lakip usab nakasud-ong sa maong trial. Kun asa man kutob ang maong paghusay kang Corona sa mga senador nga maghukom sa impeachment trial ni CJ Corona maoy gikahinaman sa katawhan ang pagpakanaug na unta nila sa ilang makuti nga hukom nga mahimong pabor ngadto sa akusado nga si Corona o pabor ba ngadto sa mga kongresista.  

Hinuon nabahin karon ang panahom sa katawhan sa ilang pagsaksi sa maong trial sanglit adunay mopadayag sa pagpabor sa mga prosecutor ug adunay mopadayag sa pagpabor sa mga abogado nga nagdepensa ni Corona.

Kadtong mopadayag sa pagpabor sa mga prosecutor ilang himoon ang pagpagakpak sa kahinangop kun matangtang man si Corona apan sa mga mipadayag og pagsupak daw magbagolbol usab sa pag-ingon nga giusikan lang sa mga senador ang ilang kahago ug panahon sa pagpahigayon og matag adlaw nga trial.

Nagpasabot nga matangtang man o dili si Corona sa katungdanan dili ang mga prosecutor o ang taga depensa ang napilde kun dili ang katawhang Pilipinhon.