Anaerobic exercise

CEBU, Philippines - “Unsa na man sad ni -- pareho ra ni atong aerobic o erobik nga ehersisyo?

Dili, kay usa usab kini ka matang sa ehersisyo. Ang katuyoan sa erobik mao lang ang pagpahaum sa normal nga kahimsog sa panglawas. Pinaagi sa paghilis sa gikaon o pagsunog sa kaloriya aron mahimong enerhiya o kusog nga magamit sa atong naandan nga kalihokan sa lawas, sibo sa sukod sa straktura sa gidak-on sa imong panglawas.

Samtang ang anaerobic o anerobik nga ehersisyo, usa kini ka laktod nga pakusogay o pabun-ogay sa lawas, aron usbon ang naandan o normal nimong straktura sa lawas. Halos tanan mong kaugatan pwersadong magamit ning Anaerobic o anerobik. Pahugtanay usab kini sa kusog, kay managko man ang mga ugat. Mausab ang gidak-on sa lawas. Inay moubos ang imong regular nga timbang, mas motaas kini kay mibus-ok o bug-at na man ang unod ug mga kaugatan. Apan kun moundang ka aning ehersisyoha, daghan ka’g mahimong mud-on o motumaw nga bationg mga sakit.

Mohinay ang lawas kay nakalitan sa artipisyal nga pagpadako kay mikunhod o nawa na ang pakusogay nga ehersisyong Anaerobic o Anerobik. Sama ning pipila ka aktibidad sa Anerobik: layatay, ambakay, dinaganay o alsahay. Sa paugnatay sama sa bisbol, tenis, putbol, baskitbol, ug uban pa.

Sa pangedaron nga lapas 40 sa lalake o lapas 50 sa babaye, mawa may o adunay sakit, unya andam ka na ning maong matang sa ehersisyo, mas maayo magpatsek-ap una sa doktor, aron mapahimangnoan sa angay o tukmang buhaton sa ehersisyo nga makaayo kanimo.