EDITORYAL - Magbabalaod angay magpasalamat

Ang mga miyembro sa hunta probinsyal sa lalawigan sa Sugbo angay magpasalamat nga may nakapakgang kanila sa giumol nilang balaod nga mao ang Anti-Tabloid Ordinance (ATO).

Hinuon di ingnon  nga danghag sila sa ilang tinguha kay malagmit bisan kun maalamon sila di man gud sa tanang higayon nagtamod sila sa ilang homework aron sinag-uhon ang batakang balaod sa nasud.

Tiaw moy sa ilang gustong mahitabo nga pitlokon nila pag-ayo   ang mga basahong tabloid ug uban   nga nagmantala sa gituohan nilang hilas ug law-ay, gusto nilang ang gobernador maoy pahikogan sa balaod.

Kay sa pipila ka probisyon nga giladlad nila, gitugpo nila ang gobernador nga maoy pakonpiskahon sa mga tabloid nga alang kanila law-ay ug hilas ang gimantala.

Unya gawas sa gobernador ang grupo nilang gitawag nga   Anti-Obscenity Board (AOB) mao usay ilang silbing inspector nga manghiling ug mohukom nga ang tabloid nga ilang gibasa nagmantala og hilas ug law-ay nga mga estorya.

Sa dihang gisusi kini sa mga abogado nga sakop sa Cebu Media Legal Aid (Cemla) ingon man sa mga sakop sa Integrated Bar of the Philippines, taga Kapisanan ng mga Brodkaster sa Pilipinas ug taga Malacanang, nasuta nga daku kaayong supak sa batakang balaod ang maong mga probisyon sa ATO.

Kay ang tinuod diay sumala sa balaod, way laing makapakanaog og desisyon sa estorya sa usa ka tabloid ug ubang basahon nga hilas ug law-ay ang iyang matang, gawas lamang sa huwes sa korte ug di kay ang ilang AOB.

Unya wa usab diay laing makamandar sa pagpasakmit ug pagbawi sa mga basahon sa maong matang sumala sa ilang pagtuo,    gawas sa korte.

Mao man gani nga ang mga sakop sa hunta direktiba sa Cebu Citizen Press Center (CCPC) mapasalamaton kaayo sa iyang adviser nga mao ang Cemla tungod kay mao kini midepensa sa gidaogdaog nga mga pamantalaang tabloid dinhi  sa Sugbo sama sa Banat News ug Super Balita. Di ba?