GAT kampiyon na sab!

Sa laing higayon gipamatud-an sa Guadalupe Airsoft Team ang katakos niini sa natad sa duwa nga airsoft dihang gilangkat niini ang laing kampiyonato sa labing awahing torneyo didto sa lungsod sa Minglanilla niadtong miaging Sabado ug Domingo.

Gipildi sa GAT ang laing upat pa ka mga team nga misalmot sa torniyo, “Curu of the Missing Comrade,” nga gipasiugdahan sa Team ISKALAWAG didto sa oval sa Minglanilla Sports Complex.

Sayo nga gidominar sa GAT ubos sa liderato ni Dionnie “Teban” Baylon ang duwa pinaagi sa pagtala og upat ka daog sa unang adlaw sa torneyo. Nakasinati og temporaryong setback ang GAT sa dihang nagsunod-sunod ang ilang kapildihan batok sa S.A.A.T ug sa S.C.A.R. sa pagtak-op sa unang adlaw ug sa pagbukas sa ikaduhang adlaw sa torneyo.

Apan ang kasinatian sa GAT sa daghan na nga mga torneyo ug kampiyonato nga gisakmit niini maoy nipatigbabaw aron mogawas nga kampiyon sa maong duwa.

Ang S.A.A.T maoy misakmit sa 1st runner-up samtang ang CRACK LEGION ug ang hiniusang pwersa sa ALCOY ug MIZRACH nagtabla sa 2nd runner-up.

Congratulations sa Team ISKALAWAG sa malampuson nga torneyo, bisan kun dunay dyutay’ng problema tungod sa dili malikayang kainit sa duwa apan gipakita sa mga organizers ang ilang katakos sa pagdumala sa torneyo.

Gipakita sab sa organizers nga wa silay gidapigan ug way tiyopi sa resulta bisan kun dunay uban nga mga marshals nga membro sa usa ka team nga misalmot sa torneyo.

Hinaut nga himuong sumbanan sa ubang mga tigpasiugda og airsoft tournament ang gihimo sa Team ISKALAWAG.

* * *

Ang hepe sa kapolisan dinhi sa dakbayan nga si Sr. Supt. Melvin Ramon Buenafe mitanyag sa iyang kaugalingon nga mamahimong “big brother, mentor” ug “role model” alang sa giilang “bad boy” sa Talisay City nga si Joavan Fernandez.

Matud ni Buenafe nga komitido siya aron tabangan ang sinagop ni Mayor Socrates Fernandez nga magbag-o.

Nidayeg ko sa pagpangarisgar ni Buenafe tungod kay sa iyang gihimo iyang gitayada ang iyang pagkatawo ug ang iyang career isip opisyal sa kapolisan.

Hinaut nga molampus siya pag-usab kang Joavan kay kun dili dako ni’ng mantsa sa iyang career. Ang ako lang gikuyawan og inay nga siya maoy sundon ni Joavan si Buenafe na hinuoy matakdan sa kabadlongon ni Joavan.

* * *

[email protected]