Lindol at tsunami

Hindi akalain nating mga tao

malakas na lindol tatama sa mundo;

At sa bansang Japan ay nangyari ito

ang nasasawi na halos libu-libo!

Talagang disaster – nahati ang dagat

nabiyak ang lupa – tubig ay tumaas;

Nabuo’y tsunami na kagila-gilalas

malalaking alon maramng winasak!

Kaya sinasabing sa naturang bansa

malakas na lindol ngayon lang tumama;

Maraming tahanan ang biglang nagiba

tao at sasakyan tinangay ng baha!

Mga mayayaman, mga dukhang tao

sa bilis ng tubig walang nakatakbo;

Kaya hanggang ngayon nagbibilang tayo

ng mga namatay at taong naglaho

Mga Pilipinong naroroon sa Japan

hindi pa masabi naging kapalaran;

Natatakot ngayon ang kamag-anakan

sila ba’y nasawi o baka sugatan?

Marapat na ngayon at tumpak na gawin

mga Pilipino’y pagdasal natin;

Mga kababayang sinakmal ng lagim –

sana’y ligtas silang magbalik sa atin!

Mga Pilipino kaya naroroon

may gawain sila sa bayan ng Hapon;

Pagka’t ang Japanese kaibigan ngayon

gumaganap sila ng dakilang misyon!

Doon ay maganda trabaho at sweldo

kaya nagtitiis na sila’y malayo;

Kung sila’y nasawi sa lindol-delubyo –

ginusto ng Diyos kapalarang ito!

Ang lakas ng mundo ay daig ng langit

kaya buhay natin ay may sinasapit;

Bansa mang malaki o bansang maliit

yagit lamang ito sa lindol at tubig!