Maayong Pasko

Grabe na kahuot ang kadalanan bisan asang dapit sa nasud. Nagbaha usab sa mga mamalitay og mga bakasyonista ang mga dapit palitanan, suroyanan ug bakasyonanan. Bisag asa ka lingi pulos Christmas party ang imong makita sa adlawan ug gabii, gani nangalanag nang uban sa ilang gipangaon.

Nagdasok usab ang mga pantalan, terminal ug tugpahanan sa mga pasahero nga mamauli sa tagsa-tagsa nila ka mga lalawigan samtang ang uban magbakasyon.

Mga maya nga panagway ang imong makita sa dagway sa imong mga masugatan seguro kay bag-o lang nakadawat sa ilang 13th month pay o ba kaha nakadawat og dugang bonus sa mga kompanya nga dagko og kita ug manggihatagon ngadto sa ilang mga empleyado.

Hinuon di upod nato ikalimod nga aduna say mga dagway nga nanggimugtok, puwerting guola kay unya pa human sa Pasko nila madawat ang ilang bonus. Aduna say wa gyoy mapaabot sa mga kompanya nga ilang gitrabahoan kay suwapang ug tikasan ang mga tag-iya niini. Samtang ang uban way kuwarta kay way mga trabaho.

Ugmang adlawa Pasko na, adlaw’ng natawhan sa atong manunubos. Busa may kwarta man o wala. May 13th month pay man o wala. May bonus man o wala may rason gihapon kita nga magmaya tungod kay adlaw’ng natawhan sa manunubos sa kasal-anan sa kalibutan.

Nindot man tinood kun aduna kay kuwarta sa imong pagsaulog sa Pasko kay makabuot ka unsay imong buhaton ug makapamalit ka sa imong gusto, apan kay wa man tay mga kuwarta magpailob lang sa ta, ang mahinungdanon malipayon ka kay ang Pasko dili alang sa mga butang nga material kon dili ispirituwal.

Kaninyong tanan nga among suki sa Banat News ug sa akong tulomanon Gerry Auxilio Saksi sa DySS /Super Radyo Maayong Pasko ug Bulahang Bag-ong Tuig.