Ang duha ka dagway sa pamolitika

Dili na bag-o ninyo ang pulong pamolitika tungod kay kanunay ninyo kining madungog gikan sa mga politiko nga nagkasungi ug sa mga tawong mausisahon sa dagan sa politika dinhi sa nasud.

Kun sawayon gani ang politiko sa iyang kaatbang, modayon siyag tubag nga pamolitika lang ang katuyoan sa pagsaway. Kun pasanginlan gani og mga kahiwian ang politiko sa iyang pagpangalagad ang sagad sa ilang tubag mao ang pulong pamolitika. Tungod niini, ang politika ug pamolitika napahiran og dautang kahulogan sa katawhan. Apan nasayod ba kamo nga ang politika dili dautan?

Kun nagtoo man kamo nga dautan ang politika, di mo nako mabasol. Hinoon maoy akong basulon ang mga politiko nga naghimong dautan sa dagway sa politika sa pagtoo sa uban. Ang dili man ugod maayong pamolitika sa mga politiko ang naghimong dautan sa politika dinhi sa ato ug sa tibook nasud. Apan ang pamolitika duhay dagway. Dili sa tanang higayon nga kini dautan tungod kay maayo ang pikas niining dagway.

Tungod sa pamolitika, nabisto ang pagpalit sa kagamhanan sa lalawigan sa luna nga gipanag-iya sa mga Balili nga nahimutang sa lungsod sa San Fernando sa kantidad nga usa ka gatos ka milyon ka pesos bisan kun ang sobra sa katunga diay niini dagat.

Tungod sa pamolitika, nabisto ang laraw ni Mayor Jonas Cortes pagpalit og luna sa dakbayan sa Mandaue sa kantidad nga 195 milyones ka pesos bisan dagat usab ang dakong bahin niini.

Tungod sa pamolitika, nabisto ang pagpalit sa kagamhanan sa Sugbo og minilyon nga kantidad sa luna para gamiton nga relocation sa mga gipang demolis natong mga kaigsoonan apan hangtod karon wa pa gyoy namuyo tungod kay bisan gani ang mga unggoy di mamuyo kay puwerting pagka pang-panga.

 Tungod gihapon sa pamolitika, nabulahan ang mga molupyo sa usa ka sityo sa Barangay Lahug tungod kay nag-abot ang Basketball Board nga gihatag sa City Hall ug ni kapitan Mary Ann Delos Santos.      

Maayo unta kun kanunay ingon ani ang pamolitika sa mga poltiko aron protektado ang atong interest diha sa kagamhanan.

* * *

Makiangayon lamang gayod ang kahitas-an sa kastigong iyang gihatag kanatong iyang katawhan tungod kay wa gyod gihapon ta makat-on. Dinhi sa Visayas giigo na ta og flash floods diin 8,000 kapin ka mga Ormokanon ang nangamatay. Ang Barangay Guinsaugon sa Leyte gitabunan og bukid nga midahili diin gatosan ka mga tawo ang nangamatay. Mao usab didto sa lalawigan sa Quezon. Apan ang maong mga katalagman murag wa makapahigmata sa katawhan sa pagpakabana unta sa atong kalikupan hinungdan gihatagan na ta’g ingon ani ka grabe nga katalagman. Sa maong matang sa katalagman nga gipatilaw kanato siyarog wa gihapon ta makat-on. Pagpakabana!