Ulug-ulog nga bakasyon

Karong nitanyag na si Cebu City Mayor Tomas Osmeña sa pagbakasyon nga way suweldo, aron pagpapas sa pagduda nga iyang gamiton ang iyang buhatan paggawong sa imbestigasyon sa kapolisan sa pasangil sa pagpanghudlat batok sa iyang anak nga si Miguel, unsa man ang buhaton ni Gobernador Gwen Garcia?

Mas mosibaw ang awhag nga mobakasyon sab si Garcia. Aron nga makabuylo ang mga pakisusi sa iyang pagpalit sa luna sa mga Balili, nga naa ilawom sa dagat sa Tinaan, Naga, habagatang Sugbo, nga gawasnon sa iyang influencia. Kun magpabilin si Garcia sa katungdanan, bisan sa pananglitan nga gitanyag ni Osmeña, maapiki siya kun itandi na sa Sugbuanong mga magbubuhis ang ilang duha ka labing gamhanan nga pangu.

* * *

Di orihinal ang gihimo ni Osmeña. Igo lang nisunod sa mga lider sa ubang kanasuran nga buhi pang kaikog sa mga namunoan ngadto sa katawhan nga ilang gialagaran. Nibakasyon si Davao City Mayor Rodrigo Duterte aron masusi ang gipasangil nga anomaliya sa pagtukod sa iyang “People’s Park.” Nibakasyon sab si Tagbilaran City Mayor Dan Lim dihang ang iyang kinaham nga barangay kapitan nga nadakpan sa kapolisan human ilambigit sa masiao.

Di lang si Garcia ang angay’ng manamin sa gihimo ni Osmeña. Hinaot madutlan sab si Provincial Board Member (PB) Juan Bolo ug iyang kaubanan sa PB. Angay sang manlipaghong sa kauwaw si Talisay City Mayor Soc Fernandez. Makaayo hinuon sa tanang hingtungdan kun makahigayon si Osmeña, samtang nagbakasyon, pagkonsulta ni Fernandez giunsa paghipos ang iyang anak nga si Joavan.

* * *

Apan wa ta matawo gahapon. Ang bakasyon ni Osmeña di makapapas sa iyang influencia sa kapolisan sa Dakbayan sa Sugbo. Mahimong magkuray gihapon sa kahadlok ang mga imbestigador nga kun maapiki si Miguel tingali’g kuhaan sa ilang allowance o ilabay sa… ahmm… Tinaan, Naga. Samang wa mawa ang influencia nilang Duterte ug Lim sa mubo nilang bakasyon.

Bisan mobiya kadiyot, si Acting Cebu City Mayor Michael Rama ug ang mga konsehal magpabilin nga iyang mga sumusunod sa BO-PK. Ang bakasyon di makapapas sa ilang kahadlok, aw pagtahud diay, niya.

* * *

Bisan pa, ang boluntaryong pagbiya sa katungdanan nakapadangat og sipa nga mensahe nga wa pa diay hingpit nga mamatay ang kaligdong sa pamunoan. Sukwahi nga mensahe ang ikapadangat nilang Garcia ug kaubanan kun moinsistir sila pagpabilin sa Kapitolyo.

Mag-agad lang hinuon ni sa katuyoan sa mga nagtungkawo sa gahom: Mobakasyon ba sila aron mahibaw-an ang kamatuoran?; o aron lang pagpahilom sa mga hinawayon ug pag-ulog-ulog sa katawhan? Masulub-on kong mopahibawo nilang Osmeña, Garcia ug ubang namunoan: Ang kaligdong sa pangalagad nitugsad na gyod tingali sa kinaubsan niyang ang-ang kay, ako, isip nagpakabana nga magbubuhis, mosugot na man lang nga ulug-ulogan og taphaw nga bakasyon.

* * *

Email:[email protected]