Envelopmental communication

Hinumdom ko nga sa paglusad sa New Society ni Marcos, nga mao say pagkamugna sa Department of Public Information (DPI), gi-introduce sa natad sa panulat, ang DEVCOM, kon developmental communication. Sa maong panahon, ambot pila ka seminar ang akong natambongan ug pila ka basahon ang akong nabasa bahin niini.

Ang tuyo mao nga gawas sa pag-entertain, gawas sa pagbalita, ug paghatag og kasayoran, unta, ang media, ang komunikasyon, makapaaghat usab sa katawhan paglihok ug pagkab-ot sa kaugmaran. Kay kun igo lang molingaw ang media, ug wa nay laing tuyo, pakyas kini.

Kinahanglan sundan kini sa kaugmaran. Dinhi magsukad ang developmental communication, diin ang media giisip nga katabang pagpaugmad sa nasud, dili kay igo lang mangita’g sayop sa gobyerno.

Apan, paglakaw sa panahon, ambut unsay nahitabo somewhere, nawala ang developmental communication, gipulihan sa ilang gitawag nga envelopmental communication. Midagsang kini panahon ni Marcos. Maoy atong pagtuo nga pagkahanaw ni Marcos, mawala usab ang envelopmental communication ug tinud-on ang developmental communication.

Si Randy David, columnist sa Inquirer ug willing makig-atbang ni Gloria kun ang Presidente mag-Congresswoman kay wa pa matagbaw pag-alagad sa lungsod, mipahinumdom kanato ning duha ka “envelopmental” incidents.

Iyang gisugilon nga tapus kono sa usa ka tigum sa Catholic Bishops’ Conference of the Philippines (CBCP) pipila ka Obispo gidapit og usa ka salosalo uban sa pipila ka opisyales sa Malacañang. Ang tuyo sa maong tigum mao ang pag-brief sa mga Obispo sa pipila ka mga isyo nga nakapabalaka sa Simbahan.

Ania si Randy: “As they stood up from the table at the end of the meal, the bishops found themselves being given envelopes containing money. The Palace assistants mumbled that the cash was meant to cover ‘expenses’ and ‘air fare.’ One of the bishops, Archbishop Antonio Ledesma, who was CBCP vice president at the time, and one of the most decent men in the Church hierarchy today, politely refused the envelope.”

Matud ni David, lagmit, standard practice kadto sa katawhan sa Palasyo. Kanus-a kaha ko maimbitar sa Palasyo no ? Ang Obispo wa magkinahanglan sa kwarta, apan, ako, ambut lang.

Gisugilon usab ni Randy ang laing susamang hitabo, nahitabo pagkasunod tuig diin, gibutyag ni Gobernador Ed Panlilio ang nahitabong pagpang-apod-apod na usab og sobreng may sulod nga kwarta.

Mao na ni ron ? Pila na kaha ka envelopes ang napasapasa sa mga kamut sa mga dungganan natong mga lider nga nakapausab sa dagan karon sa panggobyerno ? Tinuod ba ang ilang giingon nga for sale na ang tanan karon ? Ug gumikan sa kagamhanan sa kwarta, wa na konoy prinsipyohay. Pastilan, naunsa na man ta ini, Dro ?