Numero nga bantayanan

Mga suki, hangtod karon nagpadayon pa gayod ang pagdagsang sa modus operandi sa text scam ug text spam. Karong bag-o lang, nakadawat ko’g text gikan sa cellphone number 0928-7179306, nagpahibalo kanako nga gipadad-an siya’g congratulatory message gikan sa cellphone number 0920-3119658.

Ang unod sa mensahe sa 0920-3119658 mao ang pag-congratulate kaniya kay nakadaog (kuno) siya og P800,000.00 sa promo sa Phil. Charity Foundation. Giuran-uran na lang gayod sa mga badlongon ang ngalan niining maong foundation. Misalir tingali ang maong estilo sa modus kay ila man nga gipadayonan.

* * *

Ang nagpadala sa congratulatory message nagpaila nga usa ka JYS (initial). Ang gipadad-an ni JYS og congratulatory message iyang giawhag nga patawgon kaniya alang sa dugang kasayoran. O ba kaha, i-text sa prospect ang iyang ngalan, edad ug address ngadto ni JYS. Mora gyud og mao!

Maayo gani kay wala magpatonto ang prospek. Imbes nga mo-reply siya sa text ni JYS (ambot kun tinuod bang ngalan), diri siya mo-text kanako aron pagsumbong sa iyang kasinatian.

Pagbantay kamo niini kay tingalig usa kamo sa padad-an ni JYS og congratulatory text message. Ang numero sa cellphone nga iyang gigamit maoy laing numero nga bantayanan bahin sa text scam ug text spam. Timan-i ang numero niya: 0920-3119658. Kun makadawat kamo’g mensahe gikan sa maong cellphone, ayaw gayod ninyo patuli aron dili kamo mabiktima sa tinonto.

* * *

Sa laing bahin, nagpadayon pa gihapon kining misteryosong pagkahanaw sa mga load sa mga cellphone subscribers. Ambot kun kanus-a pa kini mahunong. Ambot kun kanus-a pa kini masulbad sa hingpit.

Ang tag-iya sa cellphone number 0919-5132803 mi-text kanako nga nag-ingon: "Ngano man nang Smart nga dili man lagi usahay madawat ang atong gi-text nga message bisan og na-send na nato?" -- 0919-5132803

Kini maoy laing kahibulongan nga angay ipasabot sa Smart. Nakasinati na usab ako ug ingon niini nga matang sa kakulian sa akong cellphone. Nagdahom ko nga nadawat ang akong text sa akong gipadad-an pero wala diay. Ambot kun unsay hinungdan niini.

Ang tag-iya sa cellphone number 0916-7366899 nag-ingon usab: "Sir, tinuod gyod nang bahin sa Globe nga grabe gyod sila makakuha og load."

Nagtuo ko nga ang mga network provider ra gyod ang makasulbad niining maong matang sa problema.

(Sumbong ug reklamo? Text sa 0910-8105522).