X-rated

"Diri sa Mandaue Public Market pagkadaghan na sa naninda og pirated nga x-rated nga salida. Ang uban gi-display na lang sa ilang mga stall. Dili diay na puyde dakpon? Ngil-ad baya na tan-awon ilabi na sa mga bata. Di ba naa may balaod nga dakpon ang mamaligya'g x-rated ug pirated nga DVD ug VCD?" -- 0926-3527463

Ang Optical Media Board maoy gitahasan sa atong kagamhanan pagsumpo sa suliran sa film piracy sa atong nasud.

Mas maayo sab unta kun ang lokal nga anti-indecency board mohimog lakang aron mabadlong kanang namaligyag pirated nga x-rated film diha sa dakbayan sa Mandaue.

* * *

Daghan ko’g nadawat nga text messages mahitungod sa mga PUJ drivers nga wala motuman sa rollback sa plite. Wala na lang nako ipatik ang maong mga text kay dili paigo ang atong espasyo.

Sumala sa mga sumasakay, nagpapating gyod ang mga PUJ driver ug padayon nga naningil og taas nga plitehan.

Akong awhag sa mga pasahero nga makasinatig ingon niini mao nga moreklamo gyod sila ngadto sa LTO o ba kaha sa LTFRB. Kun dili sila mopadangat og reklamo ngadto sa proper authorities, dili gayod mabadlong ang gahig ulo nga mga PUJ driver.

* * *

Hangtod sa pagsulat ning lindog, nagpadayon pa gihapon ang modus operandi sa mga dispatser diha sa highway Mandaue. Ubay-ubay gyod ang nag-text nako bahin sa binuhatan sa maong mga dispatser.

Gihasolan na pag-ayo ang mga PUJ driver sa pagpangdelihinsiya sa maong mga dispatser. Nahibulong sab ang mga driver kay maghinan-aw man lang (kuno) ang mga tanod ug polis.

Nagtuo ang mga driver nga kakunsabo sa mga dispatser ang mga tanod ug polis kay wala man sila magpakabana. Matud pa, abusado ang mga dispatser diha sa highway Mandaue busa angay gyod silang badlongon.

Angay ning aksiyonan sa mga tanod ug polis aron dili sila dudahan nga nakigkunsabo sa mga dispatser.

* * *

 (Sumbong ug reklamo? Text sa 0910-8105522).