Wa na tay ikapalit og aspalto?

Dugay ra gyud kong naglungot-lungot nga mangutana aning pangutanaha. Kada agi nako sa Sambag 1 sa may Sitio Kangkongan inig adto nako sa unibersidad nga akong gi-maestrahan, ug inig paingon nako sa duha ka dagkong tindahan diha sa may Reclamation Area, labi na kanang tungod sa may Queen City Gardens, masulod gyud sa akong hunahuna ang pagpangutana niini. Galing lang kay mahadlok sad ko basig hinginlan unya ko gikan dihi sa atong dakbayan sa uban natong mga opisyales nga daling mapikon bisan kun balido ang atong mga yangongo. Pait ra ba ning hinginlan ta gikan mismo sa atong kaugalingong lugar kay wa tay lain nga kapaingnan. Maayo na lang unta’g gikan kitas laing lugar unya milangyaw lang diri kay kun mag-kinaunsa, naa tay laing kaadtoan.

Hapit na ang Pasko ug Sinulog. Siguradong dagsaon na sab ta’g mga bisita dinhi sa atong gikapasigarbong dakbayan. Morag manglipaghong na sad akong nawong niini inig suroy nako sa akong mga bisita, nga moagi sa libaongon tang mga kadalanan. Usahay maka-ingon ko nga ang tinuod nga nakahatag og pasidungog niining atong dakbayan mao man ang mga pribadong tawo, asosasyon ug patigayon, kay kasagaran sa mga maanindot dinhi nga lugar ug talan-awon mao dili man gikan sa atong gobiyerno. Hinuon anaa’y maanindot nga SRP, nga nakatabang sa atong sayon nga pagbiyahe paingon sa south, ug magpasalamat sad ta niini, kay dako sad ra ba ni’g nakaon sa atong buhis.

Maayo na lang kay kining atong mga kongresista naningkamot sab hinuon aron makatabang sa atong imprastraktura. Daghan na kaayog flyover labi na diha dapit sa norte. Sa tinuod lang, masina man gani ko magtan-aw diha sa norte nga bahin kay maanindot kaayo ang ilang mga island sa mga dalan, labi na niadtong gipanindot ug samot pag ASEAN Summit. Diri intawon sa south nga bahin, laksot ug eyesore na ang mga island, ug anugon kaayo ang maayong pagka-atiman nga mga tanom sa island, kay ang gibutangan niini nga plantbox pwerte man sang bulingita. Gani kanang gikan ko sa probinsya nga moduaw sa among mga satellite offices, unya magtulog-tulog ko sa sakyanan, maayo pa nang akong paghinanok samtang dia pa ko sa mga hamis nga dalan diri sa probinsya, labi na kanang dalan gikan sa San Fernando hangtod sa Talisay. Unya makamata na dayon ko inig abot sa dakbayan kay mosugod na mag untol-untol ang sakyanan.

Porbida sad ning atong gobiyerno bitaw, makapalit man og mahalong mga suga sa kadalanan, laliman ka’g duol tag syen mil kada usa kadtong mga lamppost sa miaging ASEAN Summit. Apan dili na man intawon ta ka-tarong og tapak sa atong mga libaong nga kadalanan.

Dili lang unta nila lainon pagsabot kun mangutana kita’g makapalit pa ba kita’g aspalto, kay bisag gamay ra kining among buhis gikan sa among binulan nga sweldo ug mga allowances, sakit-sakit baya na sa bulsa alang kanamong mga gagmay nga empleyado. Matag palit namo sa krudo alang sa among baratohong sakyanan, anaa may patong nga buhis niina ug gikan man kana sa among bulsa. Gani, matag palit namo sa bisan unsay butang, anaa man intawoy among gibayad nga buhis, mao na nga mangutana mi, kun kanang among gibayad dili ba diay na mahimong magahinan alang sa aspalto.

Kami bitaw sab, empleyado man sab mi, ug daghan man sab ming emleyado sa gobiyerno. Dili man mi manghingilin kun dunay mangutana diri sa among opisina o mohimo og balido nga pakisusi.

* * *

Alang sa inyong mga panahom, palihug e-mail sa [email protected]. Daghang salamat.