Sinulog sa mga piniriso

Basta  sayaw  ang hisgotan, ang  usa  sa  labing inilang mananayaw  sa  tibuok kalibutan  karon  dili  gani maingon   nato  nga propesyonal  gyud  nga mananayaw, o   adunay  pormal  nga  pag-eskuyla  sa   sayaw,  ug sila  ania  dinhi   mismo  sa Sugbu.  Sila  mao   ang  mga piniriso  sa Cebu   Provincial Rehabilitation Center  kon CPDRC   nga  ubos sa pagdumala  ni   Byron  Garcia. Sa  bag-ong  isyu sa Time Magazine, nga  usa ka prestihiyosong pamantalaan, giila  ang  mga  taga  CPDRC nga  usa sa pinakadaghang mitan-aw  sa ilang   sayaw  diha  sa internet.  Sobra na   sa  siyam  ka  milyon  ka   nanan-aw,  ug  padayon  pang gasaka   ang  gidaghanon.

Gani,  dinhi  sa atoa, nakasayaw  usab  sila  sa nasyonal  nga  telebisyon  uban sa   mga  sumusulbong nga  mga bitoon   sa  TV dihang  gianha gayud sila  sa Pinoy  Big  Brother. Minilyon usab  ang  nakasaksi  niini, apan  wala  kini'y  labot  sa ihap.

Ug  karon  gusto   unta silang mohalad  sa  Santo Niño sa   ilang sayaw  atol  sa Sinulog.   Ug daghan  gyud untang  gustong mosaksi  sa sayaw  sa  mga   taga CPDRC. Apan adunay dakong problema sa  seguridad. Kay gikahadlokan  nga   moekyas ang maong  mga  piniriso   kun maadto na  sa  gawas   sa bilanggoan. Gani  diha  pay nangahadlok  nga basin  kuno mang-hostage   sila  sa mga manan-aw  o   dili  ba  sa  mga laing   mananayaw  usab  gikan sa laing   contingent.  Kun mahitabo kuno  kini,   dakong kaguliyang  ang mahitabo  sa Sugbu  atol  sa Sinulog.

Didto  sa  CPDRC, sa akong nasaksihan, basta manayaw   ang mga  piniriso, magsayon  sayon lang ang mga  taga  media og  duol sa baga  karong grupo  sa mga piniriso. Kini  sukwahi  sa mga komentaryo sa  uban  nga kuno  misayaw lang ang  mga piniriso  kay adunay mga guwardya  nga  nagpugos kanila ug  nga  ang  ilang pagsayaw sama  sa  pag-torture  kanila. Apan sa akong personal nga  nasaksihan,  ang  mga  piniriso maya  man  ang ilang panagway samtang magsayaw. Ug  akong nakita nga garbo   usab  nila  nga gitan-aw  sila sa katawhan  sa ilang  pag-sayaw.  Gani,  dihang nanan-aw  ang  mga piskal nga maoy  nagbista   sa ilang mga kaso,  mitimbaya gyud  sila ug makita namo ang ilang kalipay nga giduaw sila aron tan-awon ang ilang pasundayag,  ug  duna   pa gani huwes  nga maoy nagbista sa kaso  sa  usa kanila  nga  giingnan gyud  sa piniriso  nga  magpatan-aw gyud  siya   sa   iyang  sayaw.  Makita   nato  ang  garbo  nga ilang   gibati  nga  ang  mga  tawo  nalipay  niining  ilang gibuhat,  nga   luyo  sa  ilang dili  maayong kagahapon, aduna  pa  diay  silay kahigayonan nga  makahatag og kalipay  sa  katawhan.

Ang  mga  Pilipino adunay batasan  nga  bisan  sa  kalisud  ug mga  suliran,  maka-antigo silang  monaya-naya  sa  ilang kaugalingon.   Makaantigo silang mobangon   human  nga mapukan. Dili  sama  sa ubang mga  nasyon diin    daghang maghikog  kun makatilaw og  kapakyas   o suliran.   Mao siguro  kini   nga hingantahon ug  hinayaw  kitang  mga  Pinoy.

Gipaneguro  sa  mga tagdumala  sa  CPDRC  nga  pilion  nila  kadtong  hapit  na  mogawas aron  dili  na  kini  maengganyo  nga mopuga  atol  sa   ilang  pagsayaw sa  Sinulog.

Apan  dili  usab   nato mahimong  isalindot  ang kabalaka niadtong  mga nagdumala  sa seguridad. Niining  panahon  karon nga nagapanghitabo   kining terorismo  sa  tibuok  kalibutan,  dili nila  mahimong  isugal  ang kaseguroan  sa  katawhan.

Kun  natugutan  pa   unta sila nga mosayaw,  kini  unta  gayud ang  magpakita    sa tinuod   ug epektibo  nga disiplina  sa   atong mga  piniriso sa  CPDRC,   nga nakab-ot pinaagi  sa  sayaw   ug paghatag  kanilag  kahigayonan  nga   magpakita sa  mga  positibong kalihokan.

Alang  sa  inyong   mga panahom,  palihug  email  sa [email protected].

Daghang  salamat.