EDITORYAL – Hazing nagpadayon

Nagpadayon gihapon ang hazing bisan kini gidili na sa mga eskuwelahan. Lain nasang batan-on, menor de edad, ang namatay tungod niining gitawag nga hazing.

Kasagaran sa mga mopahigayon og hazing mao ang mga kwestiyonableng fraternity, ilabi na kadtong mga frat nga nailhan nang notoryus.

Bayolente ang matang sa hazing nga himuon niining mga notoryus nga frat mao nga dunay mangamatay ug mangaangol.

Ang kagamhanan wala gayud makapahunong niining hazing apan ang mga ginikanan sa mga estudyante tingali makatabang sa pagpaundang niini.

Angay’ng pasabton ang mga kabataan nga kining pag-apil-apil sa frat diin ang bayolenteng hazing maoy usa sa reglamento sa pagsud niini wala gayuy hinungdan ug kinahanglang likayan.

Ang kadaut nga naghuwat sa usa ka bata kanunay’ng isilsil sa hunahuna sa menor kinsa sayon rang mada sa mga pagkombinser sa mga recruiter.