Video karera ug moli-moli

Ang video karera ug moli-moli usa sa gihingusgan gayod pag-ayo paggukod sa atong mga tinugyanan sa balaod. Apan hangtod karon wala pa gayod kini masumpo sa hingpit. Nagpadayon ang operation sa mga operator ug caretaker sa video karera ug moli-moli tungod sa usa o duha ka katarongan.

Usa ka magbabasa niining lindog mi-text nga nagkanayon: “Good day, Sir. Naa unta koy reklamo bahin sa among dapit. Naa miy silingan nga nagbutang og video karera ug moli-moli. Naa pa gyuy computer. Ang akong anak dili na moeskuyla kay nag-apong pirme.” -- 0905-2505472 (09:20:31pm -- August 7, 2007)

Maayo unta kadto kun gihinganlan pa sa atong texter ang espisipikong lugar diin nag-operate ang video karera ug moli-moli aron magsilbi kining giya sa kapolisan sa pagsubay kun unsa ka tinuod kining maong impormasyon.

Ang akong ikatambag ngadto sa atong texter mao nga i-refer niya kining iyang reklamo ngadto sa mga barangay opisyal sa dapit diin siya nagpuyo. Ipasabot niya ngadto sa iyang padangatan sa iyang reklamo nga napuwerhisyo siya sa operation sa video karera ug moli-moli tungod kay nayabag niini ang iyang anak.

* * *

Sa laing bahin, ang naggamit sa cellphone number 0928-6805699 mi-text kanato ug mitaho nga diha sa Don Vicente Sotto hospital naay mga doktor nga kun moisyu og resita, i-indicate gayod niini ang ngalan sa botika nga palitan. Ibutang gayod sa resita ang ngalan sa botika. Dili hinuon tanang  doktor naghimo niini.

Morag dili man tingali kana compulsory. Nganong dili man nato hatagan og kagawasan ang mga tagtungod sa pasyente nga makapili ug makapalit og tambal sa mga botika nga medyo ubos og presyo? Sumala sa atong texter, kining botika nga nagsugod sa letrang S ang ngalan maoy ibutang sa doktor sa resita. Ngano man? Barato ba ang maong pharmacy kay sa lain? O may SOP ang doktor niini? Just asking.

“Nagpaila lang gyud nga hangol og kuwarta ang mga doktor. Nagdawatan seguro na sila og suborno nianang botikaha maong adto gyud ta papaliton,” matud sa atong texter.

 (Sumbong ug reklamo? Text sa 0910-8105522)