Hagit sa Sugbu

Silang Rey "Boom-Boom" Bautista ug Z "The Dream" Gorres maoy labing palaran nga mga boksidor sa atong panahon. Gimatuto sila sa boxing stable nga, inay mopahimus sa ilang determinasyon paglingkawas gikan sa ilang katimawa ug naandang pangandoy sa kadungganan ug katigayonan, nagtinguha pagpalambo nila hangtod sa kinapungkayan sa ilang katakos aron paghatag og dungog di lang sa mga dapit nga ilang gigikanan kon dili, ug labaw sa tanan, aron pagpasidungog sa natad nga ilang gisalmotan.

Ingon ana kalunsay ang tinguha ni Antonio Lopez Aldeguer, ang tagduma sa ALA Boxing Stable nilang Boom-Boom ug Z ug daghan pang uban, sa iyang tibuok kinabuhi nga paningkamot pagbuhi ug pagpalambo sa industriya pinaagi sa pagbukas sa ganghaan sa tanang kahigayonan ngadto sa mga nakat-on paghigugma sa bangis nga natad sa panginabuhi aron pagtuman sa ilang damgo alang sa pagtampo sa nagkanihit nga nasudnong kadungganan ug sa mas sanag nga kaugmaon.

* * *

Kon duna pay nagduda sa kadako sa natabang ni Aldeguer pagpabilin sa kahimsog sa pamoksing di lang dinhi sa ato kon dili sa tibuok gyong nasud, ila lang sutaon ang presyo sa tiket sa labing dakong boxing promotion sukad masukad sa kasaysayan sa Dakbayan sa Sugbo, ang "Moment of Truth: Battle of Cebu." Salamat sa kamanggihatagon sa bulawanong kasingkasing ni Aldeguer, ang labing kabos nga mga Sugbuanon makahimo na pagtan-aw sa linawas sa di lang usa, di lang duha, kon dili tulo gyod ka world title fights.

P200 ra ang general admission ug P2,000 ra ang ringside tickets sa promosyon nga gipanghinaot ni Aldeguer nga mao nay sinugdanan sa pagduma sa Sugbo sa labing dagko nga umaabot nga boxing events. Klarong di panguwarta ang tuyo ni Aldeguer sa iyang pakigbisog pagdaog batok sa labing tang-an nga boxing promoters sa Estados Unidos ug ubang kanasuran atol sa kalibotanong subasta sa sangka sa Puerto Rico.

Ang dungog nga iyang nahatag ug padayong ihalad sa Sugbo ug mga Sugbuanon usa lang sa tam-is nga mga bunga sa iyang tiunay nga gugma sa boksing.

* * *

Andam na bang Sugbo alang sa kalibotanong boxing events? Napamatud-an ni Aldeguer nga takos siyang makigharung ug mobuntog sa labing dagkong mga haligi sa boksing. Ang iyang kamapaubsanon nakapugong niya sa pagsakmit sa liderato, apan dakong hagit alang natong tanan-mga politiko kansang panan-aw kutob lang sa tumoy sa ilang ilong, mga magpapatigayon nga ginansiya nay gipaka-bathala ug mga tumatan-aw nga bukong ug libreng kalingawan ray giapas-ang pagtabang niya.

Si Aldeguer maoy klarong mananaog sa dako niyang pangahas pagsungasong sa tanang mga pagsuway pagda dinhi sa Sugbo sa "Moment of Truth;" ug pagtahan sa bisan unsang kahigayonan sa pagginansiya. Ang Sugbo ug mga Sugbuanon maoy labing dakong mananaog pinaagi sa pagsunod ug paghingpit sa iyang nasugdan.

* * *

Email: [email protected]