Bakit papalitan ang gobyerno natin?

Gusto nang marami’y laging nasa p’westo

kaya nag-iisip ng kung anu-ano;

Katulad na lamang ng ating gobyerno

nais na baguhi’t gawing Parliamento!

Ang sistemang ito’y kaibang-kaiba

sa nakagisnan nating palakad sa bansa;

Presidential system dati’y tamang-tama

bakit kaya ngayo’y babaguhn pa nga?

Babaguhin ito —- sabi nang marami

pagka’t di umunlad ang bansa sa rati;

Mga mamamayan ay namumulubi

dahil sa palakad di sila kumporme!

Pero sa opinyon ng pitak na ito

ano mang sistema’y di uubra rito;

Ang dapat palitan ay ang mga tao

na ang laging hangad laging nasa p’westo!

Ang asawa’t anak pati ang magulang

sa gawang mamuno ay nakikialam;

Ang ugaling ito kung mapapalitan

uunlad ang bansa at ang mamamayan!

Sa madaling-sabi ang dapat mawala

political dynasty ng mayama’t dukha;

Kung may kandidato sa isang pamilya

s’ya na lang ang dapat at wala ng iba!

Asawa at anak ng masamang lider

sa bawa’t eleksiyon huwag nang piliin;

Ang ugaling ito kung siyang gagawin

titino ang bansa’t ang gobyerno natin!

Sa nakikita ko ang PI at Con-Ass

sa gobyerno natin magsisilbing ahas;

Ang mga senador nating mambabatas

tiyak na aalma pag sila’y nalagas!

Sa sistemang ito’y lalo pang sasama

takbo ng gobyerno na nasasalanta;

Ang check and balances tiyak mawawala

at ang maghahari’y mga taong linta!