Modus sa tambal

Nauso ug midagsang karon ang mga tambal nga herbal nga gipangbaligya na gani diha sa mga botika. Maayo man kana kay makatabang usab sa pagpahimsog sa atong lawas. Basta produkto nga maaprobahan sa BFAD, makaseguro ka nga kana dili peke.

Pero ang bantayanan pag-ayo mao kining peke nga mga tambal nga gipangbaligya karon sa barato nga presyo. Mga imitasyon kini sa genuine nga herbal products. Patuohon ka lang sa nagbaligya nga ang nagbuhat sa ilang herbal products mao ra usab nga kompaniya nga nagbuhat sa herbal products nga mapalit sa mga botika nga nagdala sa samang ngalan.

Ang hinungdan (kuno) kon nganong barato ang ilang presyo mao nga direkta ang ilang pagbaligya niini. Dili sama sa produkto nga iagi pag botika nga mahal kay mopaginansiya man pod kuno ang mga botika. Makamao sab mangatarongan kining maong mga badlongon nga nagsuroy sa pagpamaligya sa peke nilang produkto!

Pananglit, adunay herbal nga tambal nga nagdala sa ngalan nga "Orie Herb Plus Capsule" nga mapalit sa mga botika nga aprobado sa BFAD. Ang mga badlongon maghimo sab og imitasyon niini nga magdala gihapon sa samang ngalan. Ila kining ibaligya sa barato nga presyo. Patuohon nila ang ilang prospek nga ang tagbuhat sa orihinal nga herbal product nga mapalit sa mga botika kauban ra nga kompaniya sa nagbuhat sa produkto nga ilang gibaligya.

Nauso na kining maong modus operandi karon. Mao nga kinahanglang magmaigmat ug magbantay kamo. Ayaw pagpalit sa mga imitasyon ug peke nga mga produktong herbal kay dili kana makaayo. Aron pagsegurong dili ka mailad, maoy palita ang mga herbal products nga tinuod gayod nga aprobado sa BFAD.

Duna sab hinuon ing mga herbal products nga sobra ra sab nga nakapatuo sa kaepektibo niini pinaagi sa mga testimonya. Dili ko moingon nga pangilad o panglingla kana kay natural alang sa usa ka advertisement nga dayegon gayod og maayo ang produkto nga giendorso. Anaa ra kana kaninyo kon motuo ba kamo niini o dili. Pero usa ko sa makapamatuod nga makaayo gayod ang ubang mga herbal products. Dili lang nako hinganlan ang ngalan sa maong produkto.

* * *

(Sumbong ug reklamo? Text sa 0910-8105522)