Pagmugna og mas dakong kaguliyang

Sa di pa mangangkon og kalamposan si architect Florentino Nimor Jr. sa Traffic Enforcement Agency of Mandaue (TEAM) sa paghapsay sa mga sakyanan sa kadalanan ubos sa Marcelo Fernan Bridge sa habig sa Mandaue, angay siyang pasabton nga di ni tungod sa iyang eksperimento. Kon dili tungod sa pagbalhin sa kasagaran sa mga sakyanan sa laing mga agianan.

Di tsamba nga dungan sa paghapsay sa UN Avenue, mas naghuot ang mga sakyanan sa nasudnong highway. Nalangay ang mas daghang pasahero ug kargamento ug busa mas dako ang kadaot sa ekonomiya.

* * *

Inay nga mosubay sa mas taas ug wa kinahanglana nga alternatibo nga mga ruta nga iyang gipamugos, ang mga motorista gikan ug padung sa D.M. Cortes Street ug North Coastal Road (nga maoy nahimutangan sa Cansaga bridge), nipili sa alang nila mas tanos ug makiangayon nga agianan:

• Ang mga nisubay niadto sa D.M. Cortes ug Cansaga paingon sa amihanan niliko paingon sa nasudnong highway; ug

• Ang gikan Consolacion ug Liloan nga niagi sa Cansaga ug D.M. Cortes paingon sa Mandaue ug Cebu City nilahos sa nasudnong highway.

* * *

Tungod sa pagka-imbudo sa tanang sakyanan gikan ug padung sa Metro Cebu ug amihanang Sugbo, ang trapiko sa nasudnong highway magkamang na sugod sa sayong buntag hangtod sa lawom nang gabii. Ang gidaghanon sa mga nalipay sa eksperimento ni Nimor wa ra sa kumingking sa bagang duot nga natanggong tungod sa nitumaw nga mas dakong problema.

Bisan ang pipila ka pasahero nga mas paspas nang makatabok sa Marcelo Fernan Bridge gikan ug padung sa mainland Cebu ug Lapu-Lapu masango ra gihapon inig sangko nila sa nabara nga nasudnong highway.

* * *

Si Nimor nangopya sa nagkayamukat nga all-right-no-left nga eksperimento ni kanhi Cebu City Mike Rama sa Banilad-Talamban corridor niadtong 2014. Bilib tingali siyang Rama o nakalimot sa sulti ni Albert Einstein: Ang pagbalikbalik paghimo og samang lakang ug pagpaabot og lahi nga sangpotanan usa ka matang sa pagpakabuang.

Ambot diin siya nakat-on sa pagduma sa trapiko. Mahimong nataligam-an ang batakang lagda paghapsay sa trapiko: Pagpalahos sa mga sakyanan sa ilang destinasyon. Sa ato pa, ang mga sakyanan para Opon di pasimangon sa Cordova.