OFW:Hawok ug esmiringhoy

Dili sayon mahimong OFW. Kinahanglan nga biyaan nimo ang pamilya, motrabaho sa mga nasod nga walay kaila, antoson ang kamingaw, kakapoy, ug usahay pangabuso. Ang uban mag-antos sa katuigan nga dili makasaulog sa pasko uban sa mga anak. Ang pipila naniguwang na lang nga layo sa bana o asawa. Silang tanan determinado pagtuman sa pangandoy: makapauli nga may ikahatag nga mas hayag nga ugma sa pamilya.

Pero sa kalibotan sa mga Duterte, mora og hayahay ang kinabuhi sa OFW. Usa ka halok, pipila ka selfie, mas abundang ulog-ulog, ug sulbad ang tanang problema.

-o0o-

Hinumdomi si Rodrigo Duterte sa South Korea sa 2018. Atubangan sa daghang tawo, gihagkan niya ang minyo nga babayeng OFW. Nahimong kalingawan ang iyang pakigtagbo sa OFWs nga angay untang hatagan og respeto. Parang Rodrigo, ang iyang presensya igo nang rason aron kalimtan ang dignidad.

Niadtong Domingo, ang anak na usab ang nisalida. Sa OFWs sa Hong Kong nga nagdala sa bug-at nga mga kabalaka sa ilang panrabaho, unsay tambag ni Sara Duterte? Pag-ayo sa ilang esmiringhoy aron magpabiling matinud-anon ang ilang bana ug uyab.

-o0o-

Ang problema sa OFWs dili kakuwang sa parayeg. Dili kakuwang sa pagpaanyag. Dili kakuwang sa pa-kyut. Ang ilang problema mao ang kalisod sa ilang trabaho, seguridad, sweldo, kontrata, pagpahimulos, kamingaw, ug ka-walay kasigurohan sa kaugmaon. Dili masulbad ang mga problema sa OFWs pinaagi sa sex tips. Sama nga wala makatabang sa ilang kahimtang pinaagi sa napriso nang amahan.

Tingali mao g’yud kini ang pamaagi sa mga Duterte. Paukyab sa mga tawo. Pakataw-on. Pakiligon. Dayon awhagon nga mobotar.

-o0o-

Sa panglantaw nilang Sara ug Rodrigo, ang OFWs dili mga trabahante nga angay panalipdan. Kon dili mga botante nga mo-abiba sa ilang drama. Hinaot nga sayop sila. Kay mayoriya sa OFWs dili ignorante. Nakakita na og daghang nasod. Nakaila na og daghang klase sa tawo. Ug labaw sa tanan, nakahibawo na sa kalainan sa tinuod nga pagtagad ug pagpahimulos lang sa ilang kahimtang.

Dili kataphaw ang ilang gikinahanglan. Kon dili respeto. Proteksiyon sa balaod. Hustisya. Ug gobyerno nga motrabaho sama nila: kamao, kugihan ug matinud-anon. Bugal-bugal sa dako nilang sakripisyo ang awhag nga palambuon ang ilang esmiringhoy.