Mga mananaog sa debate

Human sa debate nilang Cebu City Mayor Tommy Osmeña ug Vice Mayor Edgar Labella ug sa wa mahinayong debate nilang Konsehal Mary Ann delos Santos ug kanhi Mayor Mike Rama, niulbo ang lalis kinsay nidaog. Mangahas kog ambit pinaagi sa pagpili kinsay nakadaog sa nagkalainlaing kategoriya.

• Kamasinugtanon sa mga lagda: Silang Osmeña ug Delos Santos sayong nangabot, ang pagka-uwahi ni Labella mahimong usa sa mga hinungdan nga wa kasugod ang debate sa gitakdang oras;

* * *

• Kaandam sa bukas nga pamahayag: Pulos andam silang Labella ug Osmeña apan di si Delos Santos (nga mahimong nahawongan kay maoy unang gipasaka sa entablado) kay nahutdan sa oras samtang nag-intro pa;

• Kahaom sa gisul-ob: Ang berdeng campaign shirt ni Labella (bisag gihulagway ni Osmeña nga Pasko ang kolor sa iyang posters) ug ang puting gisul-ob ni Delos Santos nabantang apan ang gisul-ob ni Osmeña (nga klarong gipili sa way pagsusi sa venue) gilamoy sa susamang bulok sa backdrop sa entablado;

* * *

• Labing maayong linya: Ang pahibawo ni Osmeña nga higanteng tangke diay sa tubig ang tore sa South Road Properties (SRP) nga gisaway ni Labella nga pag-usik-usik; ang pasabot ni Labella giunsa niya pagtabang ang mga tagtungod sa kauban niyang mga biktima sa nalunod nga MV Princess of the Orient niadtong 2013 aron mabayran sa insurance bisan wa igkita ang mga patayng lawas; ug ang pasalamat ni Delos Santos sa tanan niyang igsuon nga nanguli gikan sa Estados Unidos aron pagtabang sa iyang kampanya;

• Labing bati nga linya: Ang pag-insistir ni Labella nga wa siyay labot sa mga nangangkong nahiagom sa pangabuso sa kapolisan bisan gipabarug ni Osmeña ang duha ka biktima apil nang nakulatahan nga babayeng nagsabak nga nagkugos sa iyang masuso; ang pagsuway og likay ni Osmeña og responsibilidad sa problema sa baha pinaagi sa pagbasol sa modernong drainage system sa Cebu Business Park ug Ma. Luisa Subdivision;

* * *

• Labing maayong panapos: Pagtanyag ni Labella nga maghiusa silang Osmeña human sa piniliay tungod ug alang sa Sugbo ug mga Sugbuanon; ug pagtandi ni Osmeña sa SRP sa labing mahalon ug labing dugayng mamunga nga liso nga garantiya nga magpadayon ang iyang damgo sa kaharuhay sa mga Sugbuanon bisan wa na siya.