Pulos biktima ni Yolanda

Sayop si Interior Secretary Mar Roxas sa pagpahamtang og kundisyon sa pagtabang sa nasudnong gobyerno sa Dakbayan sa Tacloban. Atubangan sa lapad nga kadaot ug kadaghan sa mga biktima, way luna ang iyang paneguro nga di kapasanginlan si Presidente Aquino nga nangilog sa gimbuhaton sa lokal nga mga opisyal pagduma sa kinatibuk-ang operasyon pagtabang sa mga biktima, paghipos sa mga patayng lawas, paghawan sa kadalanan ug pagpatigbabaw sa seguridad.

Gitinuod man niya o wa, salawayon ang pasidaan ni Roxas, nga di mapanghimakak kay na-upload sa YouTube, nga kon di mopasar og resolusyon ang Tacloban City Council pag-angkon nga di sila takos paglusad sa rescue ug relief operations bahala na sila sa ilang kinabuhi.

***

Di hinuon mabasol si Roxas sa pagpanagana. Kay nasuhito sa kalawom ug kataas ug kaseryuso sa panagsungi sa mga pamilya nilang Presidente Aquino ug Tacloban City Mayor Alfred Romualdez. Apan gipadaplin unta ang iyang pagka alyado sa politika ni Aquino ug pagka kontra sa politika ni Romualdez.

Labi na nga si Roxas direkta nga nakasinati sa kabangis sa katalagman nga niigo sa Tacloban ug kasilinganang mga dapit sa silangang Kabisay-an. Siyay usa sa labing una nga nakakita sa kalapad sa kadaot ug sa kadaghan sa nangamatay ug nangaangol. Siya untay usa sa labing unang nakamatngon sa dakong panginahanglan sa paghiusa ug pagtinabangay hinikalimtan bisan sa kasamtangan lang sa managlahing bulok sa politika.

***

Tungod sa nabisto nga pamostura ni Roxas human gyod sa bagyo nakaangkon og dugang sukaranan ang mga pasangil nga wa dayon maninuod ang nasudnong gobyerno pagtabang sa mga biktima sa Tacloban. Nakaako ba siya sa pagpugong sa kinatibuk-ang hinabang tungod sa pagdumili ni Romualdez pagtuman sa iyang sugo pagtugyan sa pagduma sa operasyon ngadto sa nasudnong gobyerno?

Di sab kalikayan ang pagduda nga si Roxas maoy tinubdan sa pasiunang kasayuran nga nakuha ni Aquino mahitungod sa trahedya. Maong wa kapugong ang presidente pagbasol sa kakuwang sa pagpangandam sa lokal nga mga opisyal ug sa pagdumili pakigsulti ni Romualdez sa una niyang pagduaw sa Tacloban.

***

May sukaranan sab ang mga kabalaka nga silang Roxas ug Romualdez managsama nga wa pang kalingkawas sa labihan nilang kakugang ug kahadlok kay managsama silang mga biktima sab sa pintas nga bagyo. Ang kamaisugon sa binayloay sa ilang mga pamahayag gitumbok nga usa sa mga hinungaw sa pait nilang kasinatian.

Hinaot nga may makaagbay nilang Roxas ug Romualdez, makakumbinser nila sa pagginhawa og lawom, sa pagpalabay lang una sa mga butang nga ilang gikasungian, aron palabihon lang una ang pagpabangon sa Tacloban ug ubang mga dapit nga labing naggusbat sa bagyong Yolanda ug pagkumbinser nilang duha nga ang gikinahanglan sa nasud mao ang ilang liderato di ang pagbinata.

***

E-mail: [email protected].