Inugurasyon ni Davide

 Social Hall, Cebu Provincial Capitol—Way bisan usa ka sakop sa mga pamilya nilang Gobernador Junjun Davide ug Bise Gobernador Agnes Magpale ang ganahan nga molingkod sa mga lamesa nga labing duol sa entablado nga gitagana alang nila:

• Ang mga paryente ni Davide nga gipangulohan sa iyang amahan nga si kanhi chief justice Hilario Davide Jr. nipili sa daplin nga lamesa sa wala nga bahin dinhi sa social hall; ug

• Ang mga paryente ni Magpale nga gipangulohan ni Cabinet Secretary Rene Almendras nipili sa mas daplin nga lamesa sa tuo nga bahin.

Usa sa mga dinapit wa kapugong pagtandi sa mga paryente sa gisundang pamunoan nga pulos ganahang magpatunga.

***

Si Cabinet Secretary Almendras, ang gituohan nga labing suod ni Presidente Noynoy Aquino sa tanang sakop sa iyang gabinete, ang labing badlungon. Pagsud pa lang niya dinhi, gigiyahan na siya sa mga kawani sa Kapitolyo ngadto sa espesyal nga lingkoranan nga gitagana alang niya. Apan niinsistir siya nga adto ipahimutang sa labing daplin nga lamesa.

Pagsud ni Davide, gipalihog ang iyang mga sinaligan sa pagdapit ni Almendras ngadto sa mas bantang nga lamesa. Apan nibalibad gihapon si Almendras ug nagpasumangil sa pagdukuduko sa iyang telepono aron nga di na makakita sa mas daghang mga opisyal nga nangamay niya.

***

Bugtong nakapabarog ni Almendras mao si Kalihim Mar Roxas sa Department of Interior and Local Government (DILG) kinsa wa mosugod pagpapanumpa sa lokal nga mga opisyal hangtod nga nisaka si Almendras sa entablado ug nitupad niya.

Pagkahuman og panumpa sa mga sakop sa Provincial Board, nilingkod dayon si Almendras. Gipatawag na sab siyang Roxas ug wa na gyod tuguti nga mokanaog pagbalik hangtod nga nahingpit ang pagpapanumpa sa katungdanan ni Magpale ug dayon ni Davide.

Human sa pakigpung nilang Davide ug Roxas, nibiya dayon si Almendras kuyog sa iyang asawa ug mga anak nga wa na magpaabot sa giandam nga paniudto. Nag-apas sa iyang flight balik sa kaulohan.

***

Nanghuy-ab ko sa diskurso ni Davide hangtod nga nisaad siya nga makapaabot ang mga Sugbuanon og matinud-anon nga Kapitolyo. Nga mao untay gitutokan inay sa pagsuway paglista sa tanan niyang nahunahunaan nga buhaton sa mosunod nga tulo ka tuig. Mas undanon ang diskurso ni Roxas nga niawhag nilang Davide ug kaubanan sa di pagpanagana paghimo og lisod nga mga desisyon basta nga ang kaayuhan sa kinabag-an ang ilang ipatigbabaw.

Huot ra kaayo ang Social Hall. Mahimong nasobrahan ra ang ilang gidapit. O nangita unta sila og mas dakong luna alang sa kalihokan. Apan di ang kanindot sa diskurso ni kahamugaway sa venue ang mahinungdanon. Sa sulti pang Davide, maningkamot sila pagpabarog og pamunoan alang sa tinuorayng kausaban, di kutob lang sa pasundayag.

***

Email: [email protected]