Kalidad sa hangin pabantayan sa probinsiya sa sugbo

CEBU, Philippines — Gipalihok na sa Cebu Provincial Government ang emergency response measures human sa nabatyagan nga dili maayong kalidad sa hangin sa Metro Cebu diin gibutang na kini ubos sa “very unhealthy” levels.

Giawhag ni Governor Pamela Baricuatro ang dinalian nga koordinasyon tali sa mga national agencies aron mabantayan ang panglawas sa publiko.

Suma pa sa Public Information Officer sa Kapitolyo, Ainjeliz dela Torre-Orong, pormal nga gihangyo sa gobernador ang Department of Environment and Natural Resources (DENR) nga mohatag og regular monitoring ug updates sa air quality levels.

Giklaro sa gobernador nga importante ang dinalian nga aksyon niini ilabi na sa posibleng risgo sa panglawas sa mga tawo nga makalanghap sa dili maayong kalidad sa hangin.

Ang mga Provincial ug district hospitals ang gimanduan usab nga ipaubos sa heightened alert isip precautionary measure batok sa posibleng motumaw nga sakit.

“Ni ask na si Gov sa DENR to give regular updates also to OCD and DOH for their recommendations,” suma pa ni dela Torre-Orong.

Si Dr. Ma. Barbra Destajo, usa ka cardiologist sa Philippine Heart Association ug volunteer doctor sa Bell-Kenz Pharma, niklaro nga risgo sa mga pasyente ilabi na niadtong dunay respiratory conditions ang nabatyagan nga dili maayong kalidad sa hangin.

Samtang nipadayag og kabalaka si Cebu City Mayor Nestor Archival sa dili maayong epekto sa panglawas sa kalidad sa hangin sa Metro Cebu nga niabot na sa estado nga kritikal ug “unhealthy”.

Ang mayor nagtuo nga resulta kini sa epekto sa environmental ug human factors. Lakip sa giingong hinungdan mao ang dugay na nga uga nga panahon nga nagdala og abog, kakuwang sa lihok sa hangin, nagkataas nga emisyon gikan sa trapiko, ug padayon nga pagdaob diin adunay mga nahitabo nga mga bush fire sa pipila ka lugar.

Isip tubag, hingusgan sa siyudad ang implementasyon batok sa pagdaob ug gipahimangnuan sab ang Barangay Environmental Officers aron magbantay ug magmonitor sa kahimtang sa hangin sa matag komunidad.

Si Archival nagkanayon nga kinahanglan nga sundon ang pahimangno sa DENR-EMB gumikan kay base sa pagtuon sa World Health Organization, ang polusyon dako og epekto sa panglawas sama sa lisod nga pagginhawa, makapahuyang sa resistensya, ug makadaot sa mga organ lakip ang baga, kasingkasing, ug utok. — Gikan sa The Freeman/Preciosa L. Bacalso/MEL BANAT NEWS