COA misaway sa CBRT

CEBU, Philippines — Anaa sa P413.7 milyones nga pundo alang sa Cebu Bus Rapid Transit ang nagpabiling wala magamit human sa kapin walo ka tuig.

Suma pa sa 2025 Annual Audit Report sa Commission on Audit (COA), P46.55 milyones lang o 10.11 porsyento, sa kinatibuk-ang P460.26 milyones nga gipagawas alang sa proyekto sukad 2017 ang nagamit sa Kagamhanan sa Dakbayan sa Sugbo.

Gipasangil sa COA hinungdan kini sa pipila ka pagkabalda sa operasyon lakip ang kawalay klarong timelines, kakuwan sa tawo ug ang kalangay sa pagpatuman sa importanteng mga component sa proyekto.

Dugang pa sa COA nga dakong babag kini sa pagpatuman sa BRT ilabi na sa pagkuha sa road right-of-way (ROW) ug mga project site.

Tungod niini, nirekomendar ang COA kang Mayor Nestor Archival pinaagi sa Cebu BRT Project Management Office (CBRT-PMO) nga maghimo og klaro nga timeline  alang sa tanang nahibiling trabaho ubos sa aprubadong program of works.

Gitahasan sab ang CBRT-PMO, Department of Engineering and Public Works (DEPW), City Planning and Development Office (CPDO), ug Department of Transportation (DOTr) nga mohatag og update sa nahibiling road construction works ug site-related tasks lakip na ang pag-ila sa mga dependency sa proyekto ug paggamit sa pondo, ingon man ang pagkuha sa concurrence sa city management ug DOTr.

Gitakda sa siyudad ang implementation period gikan Septiyembre hangtod Disyembre 2026. Nirekomendar sab ang COA nga hatagan ang CBRT-PMO og igo nga teknikal ug administratibong suporta lakip ang dugang nga mga kwalipikadong personnel, aron mapadali ang ROW ug site acquisition.

Si Archival uban sa CBRT-PMO, Human Resource Development Office, City Budget Office ug City Legal Office maoy mag-andam sa workload ug skills plan, magtudlo sa mga responsable nga personnel ug mangita sa gikinahanglang staffing ug funding approvals.

Kinahanglan sab ang koordinasyon tali sa CBRT-PMO ug DOTr aron dali nga masulbad ang mga isyu nga nagkinahanglan og interbensyon gikan sa nasudnong kagamhanan.

Gawas sa koordinasyon, gikinahanglan sab ang pagtukod og oversight o monitoring committee nga regular nga motan-aw sa progreso, timeline ug performance sa BRT project aron masiguro nga hapsay ang pagpatuman niini. — IBM BANAT NEWS