Korte wala mohatag sa TRO nga gipangayo sa OPASCO

CEBU, Philippines —  Gibasura sa Regional Trial Court (RTC) sa Cebu tungod sa kakulang sa merito ang aplikasyon sa Oriental Port & Allied Services Corp. (OPASCOR) alang sa temporary restraining order (TRO) ug writ of preliminary injunction batok sa Cebu Port Authority (CPA) ug Cebu South Harbor & Container Terminal Corp. (CSHCTC).

Sa walo-ka-pahinang order nga gipetsahan Septyembre 25, 2026, gisalikway ni RTC Branch 20 Presiding Judge Leah I. Geraldez ang hangyo sa OPASCOR nga pugngan ang CPA sa pagtugot sa mga barko nga modunggo ug mag-unload sa CSHCTC, ingon man ang pagdawat sa pribadong port operator og mga langyaw nga barko ug kargamento.

Nipasangil ang OPASCOR nga ang pagtugot sa CPA sa mga barko nga mogamit sa CSHCTC nakalapas sa mga regulasyon alang sa mga pribadong komersiyal nga pantalan ug nakaapekto sa cargo-handling operations ug kita niini sa Cebu International Port (CIP).

Apan matud pa sa korte, napakyas ang OPASCOR sa pagpakita og klaro ug dili malalis nga legal nga katungod nga nanginahanglan og proteksyon pinaagi sa injunction.

Matud ni Geraldez, dili pa matino sa korte kung nakalapas ba ang CPA sa Administrative Order No. 02-2010 o kung milapas ba ang operasyon sa CSHCTC sa mga kondisyon sa ilang permit.

Ang maong mga isyu gipaabot usab nga susihon sa Department of Transportation (DOTr).

Wala usab makita sa korte ang pagka-urgent sa hangyo sa OPASCOR. Matod sa order, giingon sa OPASCOR nga gibalhin na sa Maersk ang foreign cargo operations niini ngadto sa CSHCTC niadtong Hulyo 2024, apan kapin duha ka tuig pa ang milabay sa wala pa kini nangayo og injunctive relief.

Gisalikway usab sa korte ang alegasyon sa OPASCOR sa irreparable injury, tungod kay ang mga kapildihan nga giangkon niini, lakip ang pagkunhod sa cargo volume ug kita, masukod man pinaagi sa kantidad sa kuwarta.

Gisalikway usab ni Geraldez ang hangyo sa OPASCOR alang sa status quo ante order. Matod sa korte, sa panahon nga gisang-at ang kaso, gibalhin na sa Maersk ug CMA-CGM ang ilang mga operasyon ngadto sa CSHCTC.

Gipasabot sa korte nga ang paghatag sa injunction mahimong moresulta sa pagdesisyon daan sa merito sa kaso bisan wala pa kini hingpit nga masulbad pinaagi sa trial.

Busa, gi deny sa RTC ang aplikasyon sa OPASCOR alang sa TRO ug writ of preliminary injunction tungod sa kakulang sa merito.

Apan wala pa niini pinal nga masulbad ang mga isyu sa regulasyon nga gipangutana sa OPASCOR, nga nagpadayon pa sa mga proseso sa CPA ug DOTr. (BANAT NEWS)