Utol ng brgy. chairman, itinumba ng rider
MANILA, Philippines — Dedo ang kapatid na babae ng isang barangay chairman nang barilin habang abala sa pakikipag-usap sa kaniyang cook sa Binondo, Maynila, kamakalawa ng hapon.
Tuluyang binawian ng buhay alas 8:50 ng gabi kamakalawa sa Justice Jose Abad Santos General Hospital (JJASGH) ang biktimang si Annabelle Brinas, at residente ng Elcano St., Binondo, dahil sa tinamong tama ng bala sa leeg.
Sa ulat ni P/Senior Master Sergeant Lester Evangelista kay P/Capt. Henry Navarro hepe ng Manila Police District-Homicide Section, dakong alas-4:39 ng hapon nitong Huwebes nang maganap ang pamamaril sa Elcano St, malapit sa panulukan ng Urbiztondo St., sakop ng Binondo.
Kinakausap umano ni Brinas ang cook nitong si Aling Cora nang sumulpot ang suspect lulan ng motorsiklo at walang sabi-sabing pinaputukan ang nakatalikod na biktima na tumagos sa leeg.
Nabatid na ang biktima ay kapatid ni Brgy. 282, Zone 26 Chairman Steven Yap.
Patuloy pang inaalam ang pagkakakilanlan ng salarin at motibo sa krimen.
- Latest
