Obrero lasog sa dump truck

MANILA, Philippines - Lasog ang katawan ng isang lalaki matapos na mabundol ng isang rumaragasang dump truck habang tumatawid sa maling tawiran sa Quezon Avenue sa lungsod kahapon ng madaling-araw.

Kinilala ni Chief Insp. Enrico Figueroa, ang nasawi na si Rodel Dones, 27, binata, construction worker ng #11 Jose Abad Santos, sa lungsod.

Ayon kay Figueroa, ang biktima ay nagawa pang maitakbo sa East Avenue Medical Center, pero binawian din ng buhay.

Nangyari ang insidente sa may east-bound lane ng Quezon Avenue, sa harap ng Melendre Centre, Brgy. Paligsahan, QC, ganap na alas 12 ng madaling-araw.

Diumano, tumatawid ang biktima sa lugar nang biglang mabundol ng humaharurot na truck at malubhang ma­sugatan.

Ang nakabudol na driver ng truck, sa halip na tulu­ngan ang biktima ay tumakas, matapos ang insidente.

Agad namang rumes­ponde sa lugar ang crew ng MMDA ambulance at isinugod ang biktima sa nasabing ospital pero hindi na rin ito umabot pa ng buhay.