Donasyong dugo para sa dengue, leukemia patient tiniyak ng Taguig
MANILA, Philippines - Titiyakin ng pamahalaang lokal ng Taguig na palaging may nakaantabay na donor ng dugo ang lungsod upang matugunan ang mga magiging biktima ng sakit na dengue at leukemia sa paglulunsad ng libreng “blood typing program” sa libo-libo nilang residente.
Aabot sa tatlong daan libong residente ng Taguig ang nakatakdang sumailalim sa proyektong “city-wide blood typing” ni Mayor Lani Cayetano na tinaguriang “Type Kita …. A Blood Typing Program for 2011-2012.”
Layunin ng programang nasa ilalim ng pangangasiwa ng City Health Office na maihanda ang bawat Taguigueno sa isang “medical at emergency situation” na may pangangailangan ng dugo.
Importante umano na mabatid agad sa mga residente ng lungsod kung sino-sino ang maaaring maging donor at anong uri ng dugo sa oras ng may emergency na pangangailangan tulad ng mga biktima ng dengue at leukemia.
Sinabi naman ni Atty. Darwin Icay, tagapagsalita ni Mayor Cayetano, tuwing Sabado isasagawa ang blood typing activities kung saan humingi pa sila ng ayuda buhat sa Department of Health para sa dagdag na mga medical technologist at volunteers.
Mayroon umanong apat na uri ng dugo: ang type A, B, O at ang pinakamahirap hanapin sa lahat ang type AB.
Importante umano na mahanap kung sinu-sino ang may ganitong uri ng dugo upang mabilis ang paghanap ng donor sa panahon na may kailangang iligtas na buhay.
- Latest
- Trending