^

Banat Kalingawan

Balik sa gibiyaan nga kalibotan

INTIMATE MOMENTS - Uriel Cruz Vallecera -

Gula 36

“Pag-ayoayo,” naglukim og kasub-anan ang sinultihan ni Lucia. Gisakmit ang iyang pagbati sa kahingawa nga dili madupa, kahingawa sa mga binuhat nga gikahinugon sa pagbati kinsang lintunganay ug kahulogan lawom ra kaayong sukdon sa iyang tinugkaran.

Gikawhat niya ang pinuti nga nagbitay sa haligi ug gitakin sa iyang hawak. Gisunod niya pagbulanit ang bag nga gisudlan sa diyotay niyang sapot. Iya kining gitakliay sa iyang abaga. Ug mihinay siya paglakaw. Namatikdan niyang miduol si Dodong kang Lucia ug migakos niini. Gihapuhap sa inahan ang ulo sa bata. Milingiw siya. Dili masugakod sa iyang balatian ang maong salida.

Mikanaog siya nga nagbalon sa kasinatian sa masakit nga panamilit. Didto sa gawas, nasugatan niya ang paghingkod sa kangitngit.

Taliwala, sa kangiob sa kagabhion lagsik ang mga lihok ni Gener. Paspas ang iyang mga lakang bisan sa kangitngit. Mingaw ang dalan nga iyang gisubay. Dul-an na sa usa ka takna siyang naglakaw apan wala’y tawo nga iyang gikasugat sukad pa kaganina. Wala’y timik ang palibot. Mao ray iyang nabati ang hinagtok sa iyang mga tunob ug ang hinungaw sa iyang gininhawa.

Matag karon ug unya ang kawili sa iyang asawa ug anak daw gaway sa mantaga nga moilog pagkuyapot sa iyang hunahuna. Apan iyang gipanlimbasogan ang pagwakli sa kamingaw -- tungod ug alang sa kalinaw sa iyang banay.

Gipaspasan pa niya ang iyang mga lakang. Gitag-as niya ang iyang mga bikang. Layo pa siya sa bukid sa Kaandis nga maoy iyang tumong. Mokabat sa duha ka oras ang paglakaw paingon sa maong dapit ug moagi pag tungason kaayo nga bakilid.

Napili niya ang bukid sa Kaandis nga maoy dangpan niining iyang pagbiya sa ilang pinuy-anan. Suheto siya sa maong dapit. Sa ulitawo pa siya, kanunay siyang mokuyog sa iyang amahan sa pagpangayam og mga unggoy. Ang bukid sa Kaandis maoy kanunay nilang taakon.

Ang bukid sa Kaandis naglukdo sa ulay nga lasang. Makaplagan sa maong dapit ang daghang ihalas nga mga mananap. Apan nabantog nga palhi ug gipuy-an sa linalang sa kangitngit ang maong bukid hinungdan nga ang mga tawo dili mangahas sa pagtaak niini. Ang iyang amahan lamang ang nagbaton og talagsaong kaisog pagtaak sa maong bukid bisan nabaniog kini nga makuyaw. Ug natakdan siya sa kaisog sa iyang amahan. -- Sumpayan pa

APAN

BUKID

DIDTO

DILI

DODONG

IYANG

KAANDIS

SIYA

  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with