Naghilak nga Bituon

Gikinahanglan ang publicity. Ug dili lang kay simpleng publicity. Kinahanglan nga may paukyab ang maong publicity. May intriga aron makabig ang pagtagad sa publiko. Tinuod man o dili ang isyu, dili kana mahinungdanon. Ang importante mao nga mahimong talk of the town ang usa ka artista.

“Anugon ang imong career, Jackie,” nagkanayon ang iyang manager,” kun dili ka mosanong sa gusto nakong mahitabo. Mapugos ko sa pagpangita og laing artista nga ika-loveteam ni Jerome tungod kay dili sab ko makatugot nga masakripisyo ang career ni Jerome tungod lang sa kagahi nimo’g ulo.”

Si Jerome talent usab ni Joy Lorenzo. Nakasabot si Jackie kun nganong dili buot sa iyang manager nga maangin ang career ni Jerome tungod lang sa iyang pagdumili pag-angkon nga may relasyon sila sa tinuod nga kinabuhi.

Nahimutang karon si Jackie sa apiki. Dili mahimong i-give-up niya ang iyang career tungod kay may pangandoy siyang wala pa matuman. Iyang natimbang-timbang nga kun mabugto ang loveteam nila ni Jerome, hayan mawad-an siya’g career. Unsaon na man lang ang iyang pangandoy? Ang iyang tinguha sa pagkuha sa atensiyon ni Ethan? Naglibog si Jackie. Apan sa kadugayan nakahukom ra gayod siya. Gisanong niya ang gustong mahitabo ni Joy Lorenzo -- nga angkonon niya atubangan sa taga medya nga mag-on sila si Jerome sa tinuod nga kinabuhi. -- Sumpayan pa