Gahum sa kinabuhi

Si Porferio usa ka kusgan ug maskulado nga tawo. Kaliwat og adunahan. Mahimong di na lang motrabaho. Kay daghang mga gipaabangang apartment, office space ug commercial spaces iyang mga ginikanan.

Apan ang iyang kinaiya kaduhaduhaan pa kun maayo ba. Nahigugma siya ni Deborah, usa ka maanyag nga dalaga. Dili lang kay siya matahom og hitsura, daw santa iyang kinaiya. Pwerteng but-ana bayhana. Nag-inusara lang siya sa iyang gipuy-an sa baryo Bingbudko.

Wa siya kauyon ni Porferio. Busa wa niya dasiga ang iyang pagpangulitawo sa dalaga. Si Porferio pogoso ug arisgado nga modasdas gyud sa pagmanggad sa dalaga tungod sa iyang tawhanong pagbati ug lawasnong kaibog ni Deborah.

Gihataga’g konsuylo ni Deborah si Porferio.

"Sige Porferio. Paghulat lang og pito ka adlaw. Balik og pamisita nako human sa pito ka adlaw. Kay sugton tika. Kana kun may pagbati ka pa ba ngari nako anang adlawa," ni Deborah nga nagpahiyom.

Malaumon si Porferio nga nanaug sa panimalay sa dalaga.

"Pila ra may pito ka adlaw!" sa iyang hunahuna. Mapahiyumon siyang nanaug. Gisumbag ang walang palad sa iyang tuong kinomo sa kalipay.

Si Deborah, aron molutaw ang hingpit nga kamatuoran sa iyang kaanyag, nihimo’g mga lakang nga makapahiamgo ni Porferio. Nitomar siyag daghang isog nga mga tambal nga makapurga ug makapasuka.

Sulod sa pito ka adlaw, ang iyang gikaon iya lang isuka. Ug nagkalibang pa gyud siya. Ang iyang mga hugaw ug mga sinuka, iyang gitigum sa mga arinola, baldi, lata ug ubang sudlanan. Iyang gipangtabunan sa ilawom sa silong sa iyang balay.

Resulta sa iyang gibuhat, nidaut pag-ayo si Deborah. Mora na siya’g kalabera. Nahanaw iyang mga bigot nga kurba. Iyang pamanit niluspad nga lagumlagum. Iyang malulot nga mga mata nilundag nga daw nitago sa ilawom sa panudlanan sa mata. Namiyahok ang iyang manggahong mga aping. Paghuman sa pito ka adlaw, mahinamon nga nagpaabot si Deborah sa pagbisita ni Porferio.

 Postorawo ug ispoting kaayo si Porferio pagsaka niya sa panimalay ni Deborah. Maayo kaayo siya’g pamatasan nga nangutana sa babayeng daut ug ngil-ad nga maoy niabli sa pultahan ug nipadayon niya.

    "Hain man diay si Deborah?" ni Porferio ngadto sa babayeng wa na niya hiilhi.

   "Wa may laing nagpuyo dinhi! Ako ra man!" ni Deborah.

   "Ha? Ikaw si Deborah?" ni Porferio. Wa man mausab ang tingog sa dalaga. Nanigang mga mata ni Porferio sa kahingangha. Daw di katuo sa iyang nakita ug nadungog.

"Unsa may nahitabo nimo? Nga nidaut ka man ug nilaksot?" ni Porferio. Niping-it ang nawong.

"Akong gipanghabwa ang duga sa akong kaanyag. Ug akong gipanulod sa mga sudlanan sama sa arinola, baldi ug mga lata," ni Deborah. "Puwede nimo pahimoslan ang maong mga duga sa akong kaanyag," dugang niya.

"Hain man ang mga duga sa imong kaanyag?" ni Porferio.

"Tuas silong. Ukbi lang ang mga tinabunan nga mga sudlanan," ni Deborah.

Ninaug si Porferio ug nisuong sa silong sa balay ni Deborah. Pag-ukab lang niya sa usa ka sudlanan, nidagan siya sa kabaho. Wa gani manamilit. Wa siya kapasar sa pagsulay.

Nakatawa si Deborah. Nasuta na niya nga ang gihigugma ni Porferio ang mga plantalya lang nga naa sa lawas sa tawo. Dili ang kalag o espiritu nga naa sulod sa lawas. Nga maoy gahom sa kinabuhi nga nagpalihok sa maong lawas.

Pero kun mobalik siya unya motanyag nga tambalan niya si Deborah ug pabalikon sa kanhi niyang kabaskog, lain na sab nang istorya. (Katapusan)